mittarfiit
Illoqarfinni pingasuni mittarfinnik suliniutit aallartipput
Qaqortumi, Ilulissani Nuummilu sumiiffinni mittarfinnik sanaartorfissani misissueqqaarnerit aallarteruttorput.
Nuummi Ilulissanilu mittarfiit tallineqarnissaannut Qaqortumilu mittarfissamut misissueqqaarnerit maanna aallartinneqarput.
Misissuinerit aallarnerlugit nunap iluanit misissugassanik qillerilluni tigooqqaasoqassaaq. Ilulissani sulisoqareersoq, Nuummi qillerillutik nunap iluanit misissugassanik katersuillutik aallarteqqammerput.
Atuaruk: Siemens mittarfinnik ingerlatsivinnik nutaanik pilersitserusuppoq
Naalakkersuisoq naammagisimaarinnittoq
Sulineq maanna aallartinneqarmat attaveqarnermut naalakkersuisoq Knud Kristiansen (A) qiimmatsaappoq.
- Nuannaarutigaara, mittarfinnut nutaanut pilersaarusiornerit maannamut allaffinni ingerlanneqarsimasut ima siuartigimmata, allaat sumiiffinni mittarfiliassat inissaanni suliat ersittumik aallartinneqarsinnaalerlutik. Suliassat apinnginnerani ingerlanneqartussat aallartinneqarnerisigut piffissamut pilersaarutip malinneqarnissaa qulakkeerparput, Knud Kristiansen oqarpoq.
Misissuinissamut pilersaarutini mittarfissat eqqaanni misissugassat assigiinngitsorpassuit suliarineqassasut, aammalu sanaartornissarpiamut tunngaviliissasut Namminersorlutik Oqartussat allapput.
Atuaruk: Nuummi mittarfik tallineqarpat navianarpallaassaaq
Misileraalluni qaartitsinerit
- Qanittukkut Ilulissani misiliilluni qaartiterinerit siulliit ingerlanneqassapput, qaqqamit piiagassat pitsaassusaat pissarsiariuminassusiallu naliliiffigineqassalluni. Ilaatigut silaannarmiit nunap assiliornikkut misissueqqaarnernik ingerlatsisoqarpoq, tusagassiuutinut nalunaarummi erseqqissarneqarpoq.
Asiamit teknikerit silaannarmit assiliisaqattaarput, sumiiffiit nunap assiliornissaat aammalu mittarfissat sananeqarnissaannut eqqoqqisssaartumik uuttortaasoqarnissaa qulakkeerniarlugu.
Atuaruk: Borgmesteri: Narsarsuaq nunaqarfiuinnassaaq
Sulisut najukkameersut
Inuplan suliassanut siunnersortaavoq. Inuplan teknikkimut siunnersortinik arlalinnik attartorpoq, sulisunik nunaqavissunik amerlanerpaanik atuinissaq tunngavigalugu kalaallinik sulisoqartunik.
Kalaallit Airports A/S aamma Ineqarnermut, Sanaartornermut Attaveqaqatigiinnermullu Naalakkersuisoqarfik ataatsimoorlutik misissueqqaarnernut aallartinneqartunut ataqatigiissaarisuupput, suliani pineqartuni siumukarnissaq kissaatigineqartoq qulakkeerniarlugu.