Illoqarfinni arlalinni angajoqqaat akisussaaffitsik iperarpaat

Kommuneqarfik Sermersooq novembarimi aaqqiissuteqarpoq, tassani ulluni akissarsiffiusuni angajoqqaat meeqqaminnik unnukkorsiortitsinissaannik sininnissaannillu akisussaaffimmik kommunimut tunniussisinnaapput.

Tamanna neqeroorut Ittoqqortoormiini aamma Paamiuni angajoqqaat pisinnaalerpaat, tamanna Kommuneqarfik Sermersuumi politikerit kommunalbestyrelsimi ataatsimiinnissaani oqaluuserisassani atuarneqarsinnaavoq.

Atuaruk: Angajoqqaat aningaasarsigaangamik akisussaaffitsik iperartarpaat

- Qaammammut aaqqissuussinerit isumaginninnermut susassaqarfimmut pitsaasumik sunniuteqarsimasut takuneqarsinnaavoq taamaattumillu ingerlatiinnarneqartussamik Ittoqqortoormiini Paamiunilu atuutilersinneqassasut, ataatsimiinnermi oqaluuserisassani oqaatigineqarpoq.

Qaammammut ataasiarluni - tassa ullormi akissarsiffiusumi - kommunip illoqarfiup nunaqarfiullu meerartaanut inuusuttaanullu kommunip illuutaannut ammatitsisarniarpoq.

Unnuaq naallugu akisussaaffimmi iperaanermik nalunaarneq
Kommunimi sulisut peqatigalugit meeqqanut sammisassaqarpoq, assersuutigalugu nal- 18.00-miik 22.00-ip tungaanut timersortarfimmi fritidsklubbimilu. Kisianni angajoqqaat kissaatigippassuk, nalunaarummik atsiorsinnaapput, unnuap sinneranut ullaap tungaanullu oqartussat meeqqamik akisussaasunngortillugit.

Atuaruk: Kim: Ukiut tamarmik meeqqat ukiorisariaqaraluarpaat

- Unnuisimasut meeqqat nal. 10:00 angerlartinneqannginnerminni angajoqqaaminiilluunniit aaneqannginnerminni ullaakkorsiortinneqartassapput, naqissuserneqarpoq.

Unnukkut nerisitsinermut periarfissaq Ittoqqortoormiini Paamiunilu siullermeerluni ukiutoqqami neqeroorutigineqarpoq, ukiorlu tamaat ingerlanneqartarnissaa pilersaarusiorneqarpoq.