Illoqarfinni annerni KNI pisiniarfeqaleratarsinnaavoq
Namminersorlutik Oqartussat suliffeqarfiutaata pilersuisup KNI-p Nunatsinni illoqarfinni annerni pisiniarfinnik ingerlatsilernissaanut periarfissanik, inuussutissarsiornermut naalakkersuisoqarfimmi atorfilittat maanna misissorlugu aallartippaat.
Naalakkersuinikkut suliaqartut amerlanerussuteqartut 2020 aallarnerfigalugu KNI-imut tapiissutit 10 millioninik ikiliniarpaat. Taamatut sipaaruteqarniarneq KNI-p qaangissaguniuk illoqarfinni anginerni niuersinnaalernissaat politikerit siunniuteqqavaat.
KNI-p inukinnerusuni nunaqarfinni niuertarfinnik ingerlatsinissamut periarfissaqannginnerusuni ulluinnarni nioqquteqarnissaanik qulakkeerinninnissa ullumikkut suliassaasa ilagaat.
10 millioninik sipaaruteqarneq
2019-imut aningaasanut inatsit isumaqatigiissutigineqarmat, 10 millionit koruuninik sipaaruteqartoqarnissaa ilanngunneqarpoq, taaanna 2020-imi atuutilissaaq, tamanna tassa maanna KNI-p kiffartuussinermut isumaqatigiissutaata atuuttup qaangiunneranit ukioq ataaseq qaangiunneranit.
- Kiffartuussinissamik isumaqatigiissutip nutarterneratigut eqqarsaataavoq KNI A/S illoqarfinnut nioqqutissanik pilersuisunngussasoq, taamaalilluni suliffeqarfik nioqqutissiortut allat assigalugit sullissinerminik unammillersinnaaqqullugu ,aningaasanut inatsimmi issusuumi hunnorujulikkaanik quppernilimmi kontomi missingersuutit allanngortinneqarneranni oqaaseqaammi tamanna allaqqavoq.
Sammisaq mianernartoq
Naalakkersuinikkut alloriarneq mianernarluinnartoq tulliani oqaaseqaami ima oqaasertalerneqarpoq:
- Illoqarfinni nutaani pisiniarfinnik pilersitsisoqassappat annertuumik pilersaarusiortoqarnissaa nutaanillu aningaasaliisoqarnissaa pisariaqartinneqassapput, taamaammallu aningaasaqarnikkut sunniutaasussanut taamatullu iliornermut suli nalorninartoqarallassaaq.
KNI piareersimasoq
Illoqarfinni annerusuni niunermik ingerlatsisinnaanermik kissaateqarluni, pisortaaneq Peter Grønvold Samuelsen juullikkunni Sermitsiaq.AG-mut oqarpoq.
Sermitsiaq.AG-mi allaaserisani nangeqattaartuni ’’Pisortaanerit’’-ni ima allappoq:
- KNI illoqarfinni annerni tallimani inuinnarnut toqqaannartumik nioqquteqarfiginngisatsinnut ullumikkut uatsinnut matoqqasunut ammaassinissaq neriuutigigaluarparput.
Atorfilittat saqqummiussaat KNI-p kissaataanut iluaqutaasinnaanerat, KNI-mi pisortap neriuutigiinnarsinnaavaa. Niuertarfiit namminersortunit pigineqartut Namminersorlutik Oqartussanit pigineqartumit unammillerteqalissanersut, politikkikkut amerlanerussuteqartut naggataatigut aalajangigassaraat.
Aallartiffik
Sulinerup aallartinnera januaarip 17-anni Naalakkersuisut ataatsimiinneranni pivoq. Imaqarniliami uku aalajangiunneqarsimasut ilisimatitsissutigineqarpoq:
”… KNI-p ingerlatsivigisani illoqarfinnut unammilleqatigiiffiusutut taaneqartartunut annertusitissinnaagai pillugu, nioqqutissanik pilersuineq pillugu tapiliussami isumaqatiginninniarnernut taaneqartunut piginnaatitsissuteqarnissaq, Naalakkersuisut isummernissaannut tunngavissiami immikkut saqqummiunneqassasoq.