Illoqarfimmik ineriartortitsinissamut USA suleqataanissamut soqutiginnittoq
Avannaata Kommuniani borgmesteri Palle Jerimiassen USA-p Danmarkimi ambassadeani ataatsimeeqateqassaaq sapaatip akunnerata tulliani.
- Ilulissani illoqarfimmik ineriartortitsinissatsinnut pilersaarutigut, kommunip pilersaarutai kiisalu takornarialerinikkut pilersaarutigut ataatsimeeqatigiinnermi saqqummiutissavagut. Pilersaarutigut pillugit amerikarmiunut saqqummiussereerpugut, ambassademi ataatsimiinnissatsinnut atatillugu suleqatigiinnissamut alloriarfiunissaa naatsorsuutaavoq, Palle Jerimiassen Sermitsiaq.AG-mut oqarpo
Kommunip ukiunut qulinut tulliuttunut pilersaarutai kiisalu piujuartitsinermik ineriartortitsinissamut anguniagai aamma saqqummiunneqassapput. USA-p Danmarkimi ambassadeani ataatsimiinneq marlunngorpat tulliani pissaaq.
Aningaasaliisoqarnissaa neriuutigineqarpoq
USA pilersaarutinut aningaasaleerusunnersoq Palle Jerimiassenip ilisimanngilaa.
- Taamaattoq USA pilersaarutinut soqutiginnippoq, taamaattumik ataatsimeeqateqarnitsinni neriuutigaarput USA-mit aningaasaliiniartunit aqqutissiuussisoqarumaartoq, Avannaata Kommuniani borgmesteri oqarpoq.
Fonden for Entreprenørskab Kalaallit Nunaat USAID-ilu suleqatigiinnissamik isumaqatigiissuteqarnerannut atatillugu atsioqatigiinnermi pilersaarutinut soqutiginnittoqarnera ersersinneqarsimasoq oqaatigaa. Isumaqatigiissut Ilulissani Jørgen Brønlungip Atuarfiani septembarip 17-ani atsiorneqarpoq.
Amerikarmiut kisimik ataatsimeeqatigineqassanngillat. Pilersaarutinut tunngatillugu aningaasaleerusussinnaasut saqqummiiffigineqassapput Københavnimi Elmann Advokatpartnerselskabeup allattoqarfiani tallimanngorpat. Tassani danskit aningaasaleerusussinnaasut saqqummiiffigineqassapput.