Illoqarfimmi suliniuteqartut pinaveersaartitsisutut nersorneqartut
Pinerlutsaaliuinermut siunnersuisoqatigiit pinaveersaartitsinermik suliaqartunut siullermeerlutik nersornaasiimmata, Tasiilameersut Siu-Tsiu ajugaapput.
Siu-Tsiu Tasiilamiittoq pinerluttoqannginnissaanik suliaqarnini pillugu nersornaaserneqarpoq. Nunatsinni pinerlutsaaliuinermut siunnersuisoqatigiit tusagassiorfinnut nalunaaruteqarlutik taama allapput.
PiSiu aamma Kalaallit Nunaanni Brugseni nersornaasiinermi suleqatigiipput.
Inuusuttut sulisinneqalersut
Siu-Tsiu Tasiilami inuusuttunik ilinniagaqanngitsunik suliffeqanngitsunillu sulititsilertarput. Suliniutit assigiinngitsut ingerlallugit inuusuttut ilinniartinneqartarput suleqatigiinnermillu misilittagaqalersinneqartarlutik. Inuusuttut illumik aaqqissuussinermik, naasunik naatitanillu naatitsinermik sananermillu ilikkagaqartarput.
Suliniutinut pisortap nersornaat 20.000 koruuninik aningaasartaqartumik pissarsineq nuannaarutigaa:
- Suliagut pillugit nersorneqarnerput isumalerujussuuvoq. Siu-Tsiu Tasiilami inuusuttullu akornanni suliaqarpoq. Suliagut pinaveersaartitsinermut tunnganersut eqqarsaatigisimanngilagut, kisianni tassa taamaapput! Tamanna siunissami oqaluuserinerulissavarput, suliniutinik aqutsisoq Nivikka Witjes oqarpoq.
Suliat pingaaruteqartut
PiSiumi siulittaasoq, Julie Lynge oqaluttuarpoq peqatigiiffiit innuttaasullu pinaveersaartitsinermik suliaqarnerat inuusuttunut pingaaruteqarluinnartoq.
- Innuttaasut, suliffeqarfiit peqatigiiffiillu inunnik sullissinerat nalissaqanngilaq. Pinerlutsaaliuinermik toqqaannartumik suliaqanngikkaluarlutik, taamaattoq suliniutaat pinerlutsaaliuinermut aamma attuumassuteqarpoq. Suliniuteqartut nersorneqartariaqarput, inuiaqatigiimmi pitsaanerulernissaannut aamma aqqutissiuisuupput, Julie Lynge oqarpoq.
Siu-Tsiu nersorneqalermat Brugseni peqataassalluni nalunaarsimavoq. Nunatsinni pinerlutsaaliuinermut siunnersuisoqatigiit nersornaammik tunniusseqqaarnerat Brugsenimit peqataaffigineqarsinnaappat pisortap nuannaarutigaa:
- Najukkami suliniutit tapersersornissaat uagutsinnut pingaaruteqarpoq. Nunatta pitsaasumik ineriartornissaa, inuiaqatigiinnilu akisussaaqataanissaq uagutsinnut pingaaruteqarpoq, taamaammat nersornaammut tapersiinissatsinnut aalajangerniarneq ajornarsimanngilaq. Taama maluginiagaqarneq neriuppunga allat sulerusunnerannik aamma kinguneqassasoq, Brugsenip pisortaa Susanne Christensen oqarpoq.
Nersornaat upernaakkut 2024-mi tunniunneqaqqissaaq.