Uummannaq
Illoqarfik alianartumik nalaataqarsimasoq ingerlariaqqikkusuttoq
Uummannaq tassaarsuup kingorna nipaassimaqisoq uummarisseqqissaaq. Tassunnga tunngatillugu illoqarfiup qeqqani qiimmassaaniarluni arfininngornermi aaqqissuisoqarpoq.
Karrat kangerluani pinngortitami ajunaarnersuup kingornali naliginnaanngitsumik Uummaannaq nipaallisimavoq. Aasaanerani ukiup taamaasinerani umiatsiat uniffeqaratik angaalaanginnavittarput. Ukioq mannalu taamaanngilaq.
Aasaq allaanerusoq
- Aasaq manna aasarsarnernut allanut saniulliukkaanni allaaneruvoq, nipaannermiillu maanna atukkatsinnit ingerlariaqqissangutta illoqarfik inuummarissiteqqinniarlugu arlaannik iliuuseqartariaqartoq misigisimallunga, "Qungujugit"-mik aaqqissuisuoq, Ane Marie M. Andersen oqarpoq.
Aamma atuaruk: Tassaarsuarmit eqqugaasut: Illorsuarnut angerlarusuppugut
"Qungujugit" ualiarsaarnera tamaat illoqarfimmiunut erinarsornermik, nipilersornermik, qitinnermik, grillerinermik, kaffisornermik, tiitornermi kaangisuunnermillu misigingisaqarfiuvoq.
Taanna isumassaarsiinnarluni Marianne Løvstrøm ikiortiserisimavaa kingornali kajummissusillit aamma ikiuutissallutik nallunaarsimallutik.
Røde Korsit ikiorsiinerat
Ane Marie M. Andersinnip Røde Korsit attaveqarfigisimavai, taakkuli aaqqissuisunut arlalitsigut ikiuukkumasimapput, ilaatigut aningaasaliinikkut.
- Allaanngilaq Røde Korsit suliniuteqartoqarnissaanik utaqqiinnarsimasoq, taanna oqarpoq.
Suiataaq, taamaattoq alianaalluni
Taamaammat ullumi – suiataarluni taamaattoq alianaalluni – aaqqissuisut taakku marluullutik takuttorpassuarnut tikilluaqqisupput, Uummannarmilu innuttaasut qinnuingaat innuttaaqataalersut 200-t missaanniittut Nuugaatsiameersut Illorsuarneersulli tikilluaqqusaanissaannik. Nuannannerillu aallartinneqannginnerini, ataatsimoornissaq oqariartuutigalugu erinarsoqatigiittoqarpoq.
Nuannannermi assit allaaserisap ataani takukkit: