Nuuk
Illoqarfiit pingaarnersaata pilersaarusiorneqarnera oqallisigineqartoq
Illoqarfiit pingaarnersaata pilersaarusiorneqarnera Kommunalbestyrelsimit suliarineqarluni ingerlanneqaleruttortoq pillugu, Nuummi innuttaasut ataatsimeeqataanissaannut aggersarneqarput
Kommuneqarfik Sermersuumi pilersaarusiornermi suliniutissat takorluukkallu siulliit innuttaasunit 40-t missaanniittunit marlunngormat tusarnaariarneqarput.
Ataatsimiisitsinermi Sanarfinermut Avatangiisinullu Ingerlatsivimmi pisortap, Mike Kristiansenip, aammalu borgmesterip Asii Chemnitz Narupip 2016-ip ingerlanerani suliniutissat sukumiisumik saqqummiuppaat aammalu 2030-p tungaanut Nuummut suut takorluugaanersut saqqummiullugit.
Atuaruk: Illoqarfiit pingaarnersaannut Asii periusiorniarpoq
Nutaamik eqqarsarneq
- Innuttaasut namminersorlutillu inuussutissarsiuteqartut suleqatigalugit kommunitsinni nutaanik eqqarsaqatigiissaagut ineriartortitseqatigiillutalu. Siumut isiginitsinni, assigiinngitsunik tunuliaquteqarneq imminermini nukiuvoq, borgmesteri Asii Chemnitz Narup unnuk taanna taama aallarniuteqarpoq.
Aqqutit sisamat
Pilersaarut aqqutinik sisamanik ukkataqarpoq:
- Nuuk aningaasaqarnikkut ineriartortitsinermut qitiusoq
- Nuuk Issittumi illoqarfiit pingaarnersaattut
- Nuuk piujuartitsinermi illoqarfiit pingaarnersaattut
- Nuuk illoqarfiit pingaarnersaattut piujuaannartitsiffiusoq
Atuaruk: Illoqarfiit pingaarnersaannut periusissaq nutaaq
Biilit nutaat
2016-imi suliniutit aallartinneqartut ilagaat, biililinik taarsersuineq, tassani kommunip biilit innaallagissamik ingerlatillit/hybridit arfineq-marluk siulliit pisiarivaat, amerlaqataanillu pisinissaq tullinnguuppoq.
Atuaruk: Biilit benziinatortut Nuummi atorunnaarsinneqarnissaat anguniarneqarpoq
Kommuneqarfik Sermersooq aamma nukimmik atuinini millisarlugu aallartippoq, eqqakkanillu immikkoortiterinermik misiliilluni. Kiisalu Nuup aamma Nuussuup akornanni fjernvarme annertusineqarpoq, taamatullu kommunip sulianik ingerlatsinini sivikillisarpaa.
Atuaruk: Sermersuup eqqakkanik immikkoortiterineq aallartippaa
Takornariaqarneq
Ataatsimiinnermi oqallisigineqartut ilagaat Nuummi maannakkut siunissamilu takornariaqarneq, pinngortitaq, mittarfik, kulturi, inissiat, ilinniartitaaneq suliffeqarnerlu pillugit.