Illoqarfiit pingaarnersaata kommunia: Nunaqarfiit akikinnerusariaqarput

Kommuneqarfik Sermersuumi politikerit Nuup siunissaanut pilersaarut annertooq, atuarfinni, meeqqerivinni, attaveqarnermi aamma inissianik annertuumik aningaasaliinissartaqartoq akueralugu saqqummiunnerani, tamatuma saniatigut kommunimi nunaqarfiit pillugit siunissamut pilersaarusiortoqarpoq.

Tassanilu illoqarfiit pingaarnersaannut ineriartornissamut periarfissat oqaatigineqartunut sanilliullugu oqariartuutigineqartoq taama neriulluarnartiginngilaq.

Atuaruk: Nunatta oqaluttuarisaanerani inissianut pilersaarut annerpaaq

Sumiiffinni arlalinni nunaqarfiit ingerlanneqarnerinut aningaasartuutit amerleriarujussuarsimasut, kommunit nunaqarfiini atukkat misissoqqissaarneqarnerisa takutippaat. Taanna ''Kommuni oqimaaqatigiittoq. Nunaqarfinnut immikkoortunut pilersaartut 2017-2021'', Sermitsiaq.AG-p allagaatinik takunnikkumanermini pissarsiarisaani takuneqarsinnaavoq.

Amerlasoorpassuit nuuttartut
Nuuttarneq pissutigalugu nunaqarfiit arlallit innuttaasui ikileriangaatsiarsimanerat, unammilligassat annertuut ilagaat. Taamaakkaluartoq misissueqqissaarnerup takutippaa, sumiiffinni arlalinni ingerlatsinermut aningaasartuutit amerleriarsimasut.

Tassani ilaatigut Kulusuk pineqarpoq, taanna ullumikkut 249-nik innuttaasoqarpoq. Innuttaasumut ataatsimut aningaasartuutit, ilaatigut paaqqinnittarfinnik ingerlatsineq, atuarfik aamma utoqqarnik sullissineq tassani ilaapput, kisianni allaffinnik ingerlatsineq ilanngunnagu, ukiumut inuk ataaseq 29.300 koruuninik aningaasartuutaasarpoq.

Tamanna 2009-mit 20 procentimik amerleriarneruvoq, naak piffissami tassani innuttaasut amerlassusaat 17 procentimik ikileriarsimagaluartut, pilersaarusiami tamanna atuarneqarsinnaavoq.

Aningaasartuutit 66 procentimik amerleriartut
Nunaqarfimmili Isertumi, tassa Tasiilap kujataani 80 kilometerit missaani ungasitsigisumiittumi ajorneruvoq.

Atuaruk: Kommunissinni akisussaaffimmik tigusigitsi

- Piffissami 2009-mit 2012-imut Isertoq nunaqarfinnit tamanit aningaasartuutitigut procentinngorlugu amerlanerpaamik siuariaateqarpoq, aammalu Tunumi nunaqarfinni innuttaasumut ataatsimut annertunerpaamik aningaasartuuteqarpoq, naak aamma nunaqarfinnut Tunumiittunut sanilliullugu innuttaasui ikiliartornerpaagaluartut. Aningaasartuutit amerlassusaat nunaqarfiup inuerukkiartorneranut naleqqussarneqarneq ajortut takussutissarisinnaavaa, pilersaarummi allaqqavoq.

Isertumi innuttaasoq ataaseq ukiumut 35.200 koruuninik nunaqarfiup ingerlanneqarneranut aningaasartuutaasarpoq, tamannalu 2009-mili 66 procentimik amerleriarneruvoq.

Taamatut ineriartortoqarnera annikillisinniarlugu kiffartuussinerup appaallanneqarnissaa pisariaqassagunarpoq, taama inerniliisoqarpoq.

- Aningaasartuutit amerlassusaat aamma nunaqarfinnut kiffartuussinermut pitsaassutsit nassuiarnerisigut, aningaasartuutit pissutsinut piviusunut naleqqussarneqarsinnaassapput, pilersaarummi oqaaseqaatini atuarneqarsinnaavoq.

Nammineq akisussaaffimmik tigusisoqassasoq
Nunaqarfinnut periusissaq nutaaq naapertorlugu, ''nunaqarfiit qulaanit aammut suliniutit aningaasartaqarnarnerat sungiusimaneqarsimasoq'' taamaatinneqassasoq, tamanna allaqqavoq.

- Nunaqarfiit nammineq ineriartornissamut akisussaaffimminnik akuersaarneqassapput, kommunip nunaqarfiinut anguniakkani ilaatigut tamanna oqaatigineqarpoq.

Ilaatigut ''inuusuttunik suliniuteqartussanik'' allanik ''nukissanik pioreersunik atuinissamut'' pilerisaarisinnaasunik kissaateqartoqarpoq.

Aningaasaliinissamut aamma pilersaaruteqartoqartoq
Immikkoortunut pileraarummi aamma atuarneqarsinnaavoq, Kommuneqarfik Sermersuup siunissami aningaasaliinissani nunaqarfinnut salliunniarlugu isumaliuutigigaa.

Atuaruk: Wæver: Asii oqaluttualiarpalaartumiippoq

Ukiormanna ilaatigut Sermiligaami illunik nutarterisoqassaaq, Isertumi multibane, Kulusummi illumik kiffartuussivimmik nutaamik sananeq, Tiilerisaami eqqaavissuarmik iluarsaassineq, Kuummiuni arsaattarfiliorneq, Qeqertarsuatsiaani sanaartornermut 11,5 millionit koruunit aamma Kapisilinni imermik maangaannartitamut pilersaarusiorneq.