Illoqarfigisanni nunaqarfinniluunniit pisunnerpaagit
Timersoqatigiiffit Kattuffiata pisunnermi arpannermiluunniit illoqarfinni nunaqarfinnilu tamani sapaatip akunnerata tulliani unammisitsilerpoq. Unammisitsineq pinsip aappaani ataasinngornermi aallartissaaq maajillu 30-ani naammassissalluni.
Maajip ingerlanerani aalaneruit? Amerlasuummi aalanerunikuupput. Maaji ingerlanerani assigiinngitsunik aaqqissuisoqarpoq Maaji Nuan aallaavigalugu. Ilaatigummi utoqqaat pisuttuaqatigiissinneqarput Ilulissani, Sisimiuni, Aasianni Nuummilu. Meeqqanullu ilaatigut illoqarfinni assigiinngitsuni mini marathonertitsisoqarpoq. Maannalu Timersoqatigiit Kattuffiat naggasiinialerluni tusagassiutinut nalunaaruteqarpoq.
- Kikkut tamarmik unamminermut peqataasinnaapput – qanorluunniit ukioqaraluaraanni qasujaassuseqaraluaraanniluunniit apeqqutaatinnagu. Kilometerit tamavimmik iluaqutaasussaapput. Suliffimmut pisunnerit qimmimilluunniit aneerussinerit pineqarpata peqatigiiffik aqqutigalugu arpanneruppat, Maaji Nuan-imulluunniit peqataanerupput, ilaqutariit pisuttuaqatigigaanni, oqaloqatigiiutigaluniluunniit pisuttuartarnikkut, taava illoqarfigisavit nunaqarfigisavilluunniit angusaqarluarnissaanut iluaqutaasinnaavutit. Pisuttuaqatiserinnigit, unamminerlu tamanut siammarteruk – kilometerillu angusimavavit allannissai eqqaamagiuk, Timersoqatigiit Kattuffiat kammattuilluni taamatut oqariartuuteqarpoq.
Illoqarfigisaq nunaqarfigisarluunniit ajugaatikkusukkaanni taava immersuinermi pisunnerit arpannerilluunniit nalunaarsussavat. Taamaaliornikkut unammisitsinermi peqataalissaatit.
Pisunnerit arpannerilluunniit tamaasa uani immersugassami nalunaarsortassavatit.
- Inissisimaffiit ataavartumik allattorneqartartussaapput, taamaattumillu Timersoqatigiit Kattuffiata Facebookimi quppernerani aammalu gif.gl-kut malinnaasoqartuarsinnaavoq, Ella Grødem oqarpoq.
PISUTTA-mik aaqqissuineq Kalaallit Nunaanni Timersoqatigiit Kattuffiata Aalasamik ingerlatsineranut ilaavoq. Kalaallit Nunaanniittut aalanerulersinniarlugit ilaatigut aamma soqutigisaqaqatigiit ataatsimooqatigiilersissinnaanissaat amerlanerillu ataatsimooqatigiinnut peqataanerulernissaat anguniagaavoq.
Ilutigiiaat aamma unammisinneqassapput
Sumiiffinni assigiinngitsuni unammisitsinerup saniatigut ilutigiit aamma unammisinneqassapput. 1956-imi inunngorsimaguit 1990-imiluunniit inunngorsimaguit, 1957 1992-imiluunniit inunngorsimasut unammisinnaavatit.
- 56-iuguit 80-iuguilluunniit taava ilutitit pisuttuaqatiginiarigit, Ella qungujulluni oqarpoq.