Illersuisoq: Politiit suna tamaat misissunngilaat

Illersuisoq Páll Rúnar M. Kristjánssonip illersukkami T-ip suli pinngitsuuneraannartoq, oqaatigeqqippaa.

Politiit tassunga sukkavallaamik isummersimasut oqaatigaa. Páll Rúnar M. Kristjánssonip tikkuaavoq, politiit killisiueqqaarnerminiilllu T pisuusoq nalunagu oqarfigisimavaat. Mbl.is allappoq.

Taanna oqarpoq politiit kilisaammut ikaarneranni T hashimik annertuumik paarisaqarnini pissutigalugu ernumasimasoq.

ATUARUK: Birna pillugu suliami unnerluussisoq ukiuni 18-ini paarnaarussaaqqusivoq

Illersuisup oqaatigaa, politiit, angut biilimeeqataasimasumut – N-imut – sukkavallaamik pasilliinertik taamaatissimagaat.

Taanna isumaqarpoq, unnup ingerlanerani N-ip oqarasuaatikkut oqaluussisimaneri qanimut misissuiffigisariaqaraluaraat.

Páll Rúnar M. Kristjánssonip oqaatigaa qanimut misissuilluartoqarsimangaluarpat N-i suliami akuliutsinneqarsimassangaluartoq.

Illersuisuip aamma oqaatigaa, inussat ipaasaat Birna biilimut ingerlatsisinnaanermut allagartaani nassaarineqarsimasut ilumut illersukkamininngaanneersut qulakkeerlugu oqaatigineqarsinnaannginnerarpaa. Siullermik politiit inussat ipaasaannik ilisimasalittap nassaarineqarsimasut atorsinnaannginnerarsimavai. Kingornalu norskip ilisimasallip inussat ipaasai immikkoortuni aqqanilinni T-iminngaanneersuunerarpai. Islandimiullu eqqartuussivianni suleriaaseq naapertorlugu immikkoortut aqqaneq-marluunissaat piumasaqaataasoq, áll Rúnar M. Kristjánsson tikkuaavoq.

Taassuma saniatigut illersuisup T-p politiinit danskisuinnaq tuluttuinnarluni kalaallisoq nutserinertaqanngitsumik killisiuisimanerat isornartorsiorpai.

Ataatsimut isigalugu taanna isumaqarpoq, unnerluussisussaatitaasut uppernarsaatit saqqummiussai amingaateqartut, taamaammallu illersukkani pinngitsuutinneqartariaqartoq.

Suliami eqqartuussut sapaatit akunnerit sisamat ingerlanerini pissaaq.

ATUARUK: Birnap arnaa: - Inuugallarneratut eqqaamassavarput