Illersuisoq aamma PPK: Utoqqaat pillugit periusissiaq sulisussaaleqinermut aaqqiissutissanik imaqanngilaq
Utoqqaat illersuisuat aamma Peqqinnissaq pillugu Kattuffiit PPK utoqqarnut suliassaqarfimmi maanna sulisussaaleqineq ilungersunartoq pillugu ernumassuteqarput, peqqinnissaqarfimmilu sulisut amerlasuut ukiut tallimat ingerlaneranni suliunnaartussallutik.
Naalakkersuisut utoqqaat pillugit periusissiaat februaarip 27-anni saqqummersoq isumaginninnermi suliassaqarfimmi peqqinnissaqarfimmilu sulisussanik amerlanerusunik sulisoqalernissaanut aaqqiissutissanik siunnersuutitaqanngilaq. Tamanna Utoqqaat illersuisuata aamma Peqqinnissaq pillugu Kattuffiit PPK-mit ernumassutigineqarpoq.
Aviisi Sermitsiaq taama allappoq.
- Tassami sulisut ukiut tallimat ingerlaneranni soraarninngortussat amerlammata ilungersunarpoq, ilami sulisinnaasut piginnaasaqarluartut peqqissaasut allallu peqqinnissamut ilinniagallit soraarninngussapput, Peqqinnissaq pillugu Kattuffiit PPK-p siulittaasua Ken Jensen oqarpoq. Taassuma utoqqaat pillugit periusissiami pisortat suliffiini sulisut 423-t ukiuni 2022-mi aamma 2023-imi utoqqalinersiuteqalerlutik soraarninngortussat misissuataarinermini takuai, amerlanerpaallu Peqqinnissaqarfimmi sulisut soraarninngortussaapput. Ken Jensenip kisitsisit saqqummiunneqartut qularnarsinnaanerarpai, tassami utoqqaat vikaritut sulimmata, taakkuli atorfiliunngillat.
- Kalaallit Nunaanni utoqqalineq atugarliorfiuvoq. Taamaattumik sulisussaaleqinermik ajornartorsiut politikkerit qanoq periuseqarfiginiarnerlugu, inupparujussuillu utoqqalisut napparsimalerlutik sullittariaqalersussaapput, illuatungaanillu sulisussat ikiliartortut, tamannalu ilisimareerlugu, taanna qanoq aaqqinniarneraat takutinnagu, uanga nalileruminaatsippara, Utoqqaat Illersuisuat Inga Egede oqarpoq.
Aviisimi Sermitsiami atuarnerusinnaavutit. Aviisi uani pissarsiariuk:
