Illersornissaqarfiup mittarfimmut akiligassat akilissavai
Kangerlussuarmi mittarfimmut 2500 meterisut takissusilimmut nutarterinissamut aserfallatsaaliuinissamullu aningaasartuutit danskit illersornissaqarfiata isumagissavai. Akerlianik mittarfiup sakkutuujunngitsunit atorneqarneranut aningaasartuutit tamarmik nunap karsianit akilerneqassapput. Nunanut allanut sakkutuujunngitsunit timmisartuussisoqartassanersoq suli ilisimaneqanngilaq.
Kangerlussuarmi mittarfiup siunissaa pillugu isumaqatigiissut sivisuumik utaqqineqartoq Naalakkersuisunit aamma danskit naalakkersuisuinit ataasinngornermi isumaqatigiissutigineqarpoq. Kisianni Nuummi Ilulissanilu mittarfissuit piareerpata, Kangerlussuup sakkutuujunngitsunit atorneqartarnissaa pillugu isumaqatigiissut apeqquterpassuarnik pilersitsivoq.
Ukiumi kingullermi Naalakkersuisumit aamma Danmarkimi naalakkersuisunit allanngorartunit arlaleriarluni nalunaaruteqarnerit malillugit, Kangerlussuarmi mittarfiup aserfallatsaaliuineqarnissaanut aningaasartuutit naatsorsuutigineqareersutut Illersornissaqarfiup akilertussanngorpai.
Mittarfik maanna 2800 meterinit siunissami 2500 meterisut takissuseqalersinneqassaaq, illersornissaqarfiup tamanna pisariaqartitaanut naammammat, sinaakkutissatut isumaqatigiissummi ilaatigut tamanna oqaatigineqarpoq.
Mittarfeqarfiit suli ingerlatsisuussapput
Kalaallit Nunaat mittarfimmik suli piginnittuuginnassasoq aamma sakkutuujunngitsunit suli atorneqarsinnaassasoq, isumaqatigiissummi aamma atuarneqarsinnaavoq.
Issittumi piginnaasanik annertusaanermik isumaqatigiissutip maajimi 2022-meersup atuutilersinneqarnissaa aamma nunani tamalaani sillimaniarnikkut politikkimi pissutsit qanoq innerannik sakkutuut siunissami pisariaqartitaat apeqqutaapput.
Mittarfeqarfiit illersornissaqarfimmut kiffartuussineq suli suliarissavaa, kiisalu mittarfimmi inuinnarnut suliassat tunngasut, sapinngisamillu taakku nunaqavissunit suliarineqartassapput. Tamanna aamma mittarfiup kalaallinit suli pigineqarnissaa Naalakkersuisut siulittaasuata Múte B. Egedep isumaqatigiissut pillugu Facebookimi allatamini erseqqissaatigaa.
Illersornissaqarfik ukiuni isumaqatigiissutaasuni imaluunniit Illersornissaqarfiup pisariaqartitsinera malillugu Kangerlussuarmiissaaq, taamatullu aamma Amerikamiut illersornissaqarfiata mittarfik atorsinnaassavaa.
Sakkutuujunngitsut mittarfimmik atuinerat Illersornissaqarfik peqatigalugu ataqatigiissarneqassapput inuinnarnillu timmisartuussinernut atatillugu aningaasartuutit Kalaallit Nunaannit akilerneqartassapput. Tassa inuinnarnit mittarfiup atorneqartarnera illersornissaqarfimmit akuersissutigineqartarnissaa ilimanarpoq.
Misissuinerit aallartinneqassapput
Isumaqatigiissummi suut ilanngunneqassanersut misissuinermit aallartinneqartussamit qulaajarneqassapput, taannalu marsip naanerani 2024-mi naammassinissaa naatsorsuutigineqarpoq, taamaalilluni 2025-utinnagu isumaqatigiissuteqartoqassaaq.
- Timmisartut suut atorneqarnersut ilanngullugit, Illersornissaqarfiup mittarfimmik atuinera
- Atortut, qanorissusissaat, aserfallatsaaliorneqarnissaallu ilanngullugit mittarfiup takissusissaanut, silissusissaanullu Illersornissaqarfiup piumasaqaatai
- Illersornissaqarfiup illuutitigut il.il. Pisariaqartitai
- Sullissinerit Mittarfeqarfiit A/S-imit isumagineqartussat Illersornissaqarfiup kissaatigisai
- Danskit kalaallillu oqartussaasa akornanni ataatsimoorussamik suliaqarnissamut periarfissaqarnersoq, Illersornissaqarfiup Naalakkersuisullu misissussavaat
Kangerlussuarmi innuttaasunik timmisartuussisarneq misissoqqissaarneqassaaq. Inuinnarnik timmisartuussineq pillugu niuernermik tunngaveqarlutik ingerlatseqatigiiffiit attuumassuteqartut misissuiffigineqassasut aamma naatsorsuutigineqarpoq.
Mittarfissuit nutaat atulerneqarnerisa kingorna nunaqarfimmi sulisut qanoq amerlatigisut atorneqartussaanerat suli nalunarpoq. Isumaqatigiissut pillugu Kangerlussuarmik innuttaasunik ataatsimiititsinissamut Naalakkersuisut ataasinngornermi unnukkut qaaqqusipput.