Illersornissaqarfimmi inuusuttut ilinniagaqarusuttut tapiiffigineqassanngillat
Illersornissaqarfimmi ilinniagassanut alapernaaseraanni pinngitsooranilu sakkutuunngornissaq misilitsiffiginiaraanni, taava Danmarkimut angalaneq nammineq isumagineqassaaq akilerneqassallunilu. Siornatigut periutsimik ajornerulersitsineruvoq, taamatut uparuaavoq ilinniarnissamut ilitsersuisoq aamma politikeriusoq.
Ilinniartitaanermut Naalakkersuisoq naapertorlugu pinngitsoornani sakkutuunngornissamut misilitsinneq ilinniagaqarnersiutit pillugit malittarisassani ilaanngilaq.
Tassa pinngitsoorani sakkutuujunissamut ilinnialernissamut piginnaaneqartuuneq paaserusukkaanni, taava Danmarkimut angalaneq aamma Åbent-Hus-imik aaqqissuussinermi peqataanissaq nammineq akilerlugu pissaaq, aviisi Sermitsiaq allappoq.
Malittarisassat erseqqinngitsut
Ukiuni kingullerni pingasuni Illersornissaqarfik Kalaallit Nunaanni pinngitsoornani sakkutuunngornissamut misilitsinnernik ingerlataqartarpoq – 2019-imi ilinniagaqarfiusuni illoqarfinni angisuuni sisamani – kisianni tamanna taamaatinneqarpoq Naalakkersuisunit tamatuminnga kissaateqarneq malillugu. Misilitsinnerit Kalaallit Nunaanni ingerlanneqartannginneranni ilinniagaqarnersiutinik ingerlatsiviup Danmarkimi misilitsikkusuttut angalanermut aningaasartuutaat akilertarpai.
Taamatut oqaluttuarpoq Københavnimi Kalaallit Illuutaanni ilinniarnermut ilitsersuisoq Pia Rosing Heilmann Namminersorlutik Oqartussat ilinniarnermut nittartagaannik innersuussisoq: www.sunngu.gl, tassani sakkutuunngorniarluni ilinniagassat pillugit suli allassimasoqarluni: ”Misilitsikkiartussaguit imaluunniit Danmarkimi sakkutuut iluanni soorlu innaallagialerisutut, mekanikerisut allatulluunniit ilinnialissaguit Danmarkimut angalanerup akilerneqarnissaa qinnutigisinnaavat. Misilitsikkiartornissat uppernarsarsinnaasariaqarpat.”
Allaaserisaq tamaat uani Sermitsiami pisiarisinnaasanni atuaruk: