Illersornissaqarfik US Air Forcelu Kangerlussuarmik atuilluartarput
Illersornissaqarfiup Issittumi suliassai amerliartuinnarput, taamaammat Kangerlussuarmi timmisartoqarfik Danmarkimut pingaaruteqarpoq
Illersornissaqarfik Kangerlussuarmi timmisartoqarfimmik 2023-p kingorna suli atuiinnarsinnaassaaq.
Tamanna erseqqissumik saqqummiunneqarpoq, illersornissamut ministerip Trine Bramsenip (S) pingasunngormat tunngaviusumik isumaqatigiissummik atsioreernerata kingorna, aamma Nuummi Ilulissanilu mittarfissat nutaat, timmisartoqarfik matuneqassanersoq qularnartoqartilermassuk.
Illersornissamut ministerip Trine Bramsenip nassuiaatigaa, Illersornissaqarfiup sumiiffimmi suliassai amerlanerulissasut, timmisartoqarfeqanngippallu Danmark nakkutilliinissamut, oqartussaaffimminik isumaginninnissamut aamma ujaasillunillu annaassiniartarnissamut pitsaanerpaamik tunngavissaarutissasoq.
Ullumikkut danskit amerikamiullu illersornissaqarfiisa timmisartoqarfik atorluareerpaat:
* Illersornissaqarfiup alapernaarsuinermini aamma Kalaallit Nunaata killeqarfiini oqartussaaffimminik isumaginnittarnermini Kangerlussuarmi timmisartoqarfik atorluartarpaa.
* Timmisartoqarfik aamma atorneqartarpoq, Kalaallit Nunaanni sakkutooqarnikkut ikkussukkat atortussaannik sulisunillu assartuinermut.
* Aamma danskit timmisartuisa sakkullit Nato-milu suleqatit – pingaartumik USA – timmisartukkut assartorneqarnerannut Kangerlussuaq atorneqartarpoq.
* 2016-imi Det Danske Flyvevåben timmisartoqarfimmi 255-eriarluni suliaqarsimavoq (mittarlunilu aallartarsimavoq).
* Det amerikanske luftvåben 278-eriarluni suliaqarsimavoq.
* Sakkutuut timmisartuussisarnerat sakkutuujunngitsut Atlantikoq qulaallugu timmisartuussisarnerattulli amerlatigipput.
* Illersornissaqarfik aallarnermi ilaasunullu akitsuutinik akiliuteqarneq ajorpoq. Akerlianik nalinginnaasumik ammasarnerup avataatigut, ammaanermi akiliutissat affaat Illersornissaqarfiup akilertarpai.
* Aamma Illersornissaqarfik timmisartoqarfimmik atuinersarnermini – Nunatta Karsianut Mittarfeqarfinnullu toqqaannartumik 6,4 millioner koruuninik akiliisarpoq.