Skip to main content

Illersornissaqarfik ujaasillunilu annaassiniartarneq pillugu paasissutissiisarunnaarpoq

Illersornissaqarfiup ulloq unnuarlu nalunaarusiortarnini unitsissimavai, nalunaarusiortarneq aqqutigalugu Kalaallit Nunaanni innuttaasut ujaasillunilu annaassiniartarnerit pingaarutillit pillugit paasitinneqartaraluarput.

Illersornissaqarfiup ulloq unnuarlu nalunaarusiortarnini februaarip tallimaanili unitsissimavai, nalunaarusiatigut suliat immikkut ittut, soorlu ujaasillunilu annaassiniartarnerit Kalaallit Nunaanni innuttaasunit soqutigineqartartut allaaserineqartarput.

Illersornissaqarfik februaarip arfineq-pingajuanni nittartakkamigut imatut ilisimatitsivoq:

- Ulloq manna allarnerfigalugu ulloq unnuarlu nalunaarusiortanerit unitsinneqarput. Naatsorsuutigineqarpoq ulloq unnuarlu nalunaarusiortarnerit kingusinnerusukkut aallarteqqinneqassasut. Tamatumali qaqugu aallarteqqinneqarnissaa maannakkorpiaq ilisimaneqanngilaq.

Obersti: Tunngavik pingaarutilik

Illersornissaqarfiup attaveqartarnermut immikkoortortaqarfiani pisortap oberstip Susanne Lundip Sermitsiaq.AG-mut allakkatigut akissuteqarnermini ilumoornerarpaa ”ulloq unnuarlu nalunaarutit Illersornissaqarfiup Naalagaaffeqatigiit sinnerlugit suliarisartagai pillugit paasissutissiinissamut pingaarutilittut tunngaviusartut”.

Oberstip taakku pingaaruteqarneraraluarlugit ilisimatitsissutigisinnaanngilaa, ulloq unnuarlu nalunaarusiortarnerit qaqugu aallarteqqinneqassanersut, tamatumunngalu pissutaanerarpaa ”illersornissaqarfimmi suleriaatsit allanngortinneqarsimanerat”.

IA sinnerlugu folketingimi ilaasortap Aaja Chemnitz Larsenip oberstip nassuitaataa pingaarnersiuineralu naammaginngilai.

Ammasumik ingerlatsinissaq pingaaruteqartoq

- Illersornissaqarfiup nunatsinni suliaqartarnerani ammasumik paasineqarsinnaasumillu ingerlatsinissaq soorunami pingaaruteqarpoq, taamaammat Illersornissaqarfiup ulloq unnuarlu nalunaarusiortarnermik pingaartitsinnginnera ajuusaarutigaara, folketingimi ilaasortaq Sermitsiaq.AG-mut oqarpoq, itisilerlugulu oqarluni:

- Issittumi Sakkutooqarfik pingaarutilinnik suliaqartarpoq, soorlu imaani ajutoortoqartillugu annaassiniartarluni, inuppassuarnilli aamma Illersornissaqarfiup nunatsinni sakkutuutut sunik suliaqartarneranik ilisimasaqannginneq ernummatigineqarpoq, taamaammat kaammattuutigiinnarsinnaavara sapinngisamik ammanerusumik suliaqartoqartarnissaa, suliassammi matoqqasumik ingerlanneqartarnerat pissutigalugu ernumassuteqarneq annertusiartorsinnaammat.

Ministerimut apeqqutit

Aaja Chemnitz Larsenip illersornissamut ministeri Trine Bramsen marlunnik apeqquteqarfigalugu nassuiaasioqqusimavaa:

Tamatumunnga suna pissutaava?

Illersornissaqarfik Kalaallit Nunaanni suliaqartarneq pillugu ulloq unnuarlu nalunaarusiortarnermik qaqugu aallartitseqqissava? 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER