Illersornissaqarfik allaffimmik nutaamik Nuummi ammaavoq

InterForce Grønland, InterForcemut Nuummi juunip arfineq-pingajuani Nuummi ulluinnarni aqutsisussanik pilersitsisimasumut immikkoortortaqarfiuvoq. Illersornissaqarfiup Liv Inuk Oldenburg Lynge ataqatigiissaarisutut suliassanillu aqutsisussatut atorfinitsereersimavaa, taanna illoqarfiit pingaarnersaanni Issittumi Sakkutooqarfiup illutaani allaffeqassaaq.

Sermitsiaq.AG-mit siorna juullilersoq Liv Inuk Oldenburg Lynge, Ottawami danskit ambassadeanni sulinermik sungiusartoq ilanngutassiarineqarpoq: Liv Ottawami: Ingerlariaqqissutissaraara

Interforce, Københavnimiittumi Kastelletimi allattoqarfeqartoq, sakkutuut suliffeqarfiillu imminnut ataqatigiilernissaannik anguniagaqarpoq.

Takunnissinnaalersitsiniartut

- Sakkutuut piginnaasaannut tunngatillugit inuussutissarsiuteqartut takunnissinnaalersikkusuppavut. Aamma sakkutuut sukkulluunniit aggersarneqarnissamut piareeqqasut piginnaasaannik inerisaasinnaavugut suliffeqarfinnut iluaqutaasussanik, InterForcep allattoqarfiani kaptajnløjtnant Christian Meinertz nassuiaavoq.

Sakkutuup sukkulluunniit aggersarneqarnissamut piareeqqasup najukkami suliffeqarfimmut qanoq iluaqutaasinnaaneranik assersuusiorami taavai suliassamik aqutsinermi, ikiueqqaarnermi ilinniartitsineq imaluunniit assersuutigalugu biilinik angisuunik ingerlatsisinnaanermut allagartaqarneq.

Immikkut ittumik atugassaqartinneqartut

- Sakkutuujutitta aggersarneqarnissamut piareeqqasut, Illersornissaqarfimmit sungiusarnissamut ilinniagaqaqqinnissamullu aggersarneqaraangamik immikkut ittumik atugassaqartinneqarnissaat suliffeqarfinnit paasineqarnissaa pingaaruteqarpoq, kaptajnløjtnanti InterForcep suliassai pillugit nassuiaavoq.

InterForce Grønlandip nittartagani atuarneqarsinnaavoq, "InterForce suliassarpassuarnut akisussaaffeqartoq, soorlu paasissutissiiniarluni ataatsimiitsitsineq, attaveqaatinik suliaqarneq, suliassanut pilersaarusiorneq kiisalu oqallittarfiit assigiinngitsut aqqutigalugit attaveqartarneq. Suliniutit tamarmik Kalaallit Nunaanni nammineq kajumissutsimik suliaqartartunut imaluunniit allatut Illersornissaqarfimmi sakkutuut suliassaasa ilaannut tapersiissutaasussaapput".

Sakkutuut InterForce Grønlandimut tunngatillugu ataqatigiissaarisorivaat kommandør John Boye Rasmussen, Issittup Sakkutooqarfiani pisortap tullia.

Ulluinnarni aqutsisut

Ulluinnarni aqutsisut inuttarivaat:

Kristian Reinert Davidsen, Tele Postimi pisortaaneq

Mette Skarregaard Pedersen, Pinngortitamut, Avatangiisinut Ilisimatusarnermullu Naalakkersuisoqarfik, Namminersorlutik Oqartussat

Ulla Lynge, CSR Greenlandip Allattoqarfiani pisortaq

Peter Grønvold Samuelsen, KNI A/S-imi pisortaaneq

Marie Fleischer, Kommuneqarfik Sermersuumi pisortap tullia

Bjørn Bay, Kalaallit Nunaanni politimesteri

Martin B. Kviesgaard, Grønlandsbankenimi pisortaq

John Boye Rasmussen, Issittup Sakkutooqarfiani pisortap tullia Militær Koordinatorilu

InterForcep nuna tamakkerlugu ataatsimiititaliaani ullumikkut siulittaasuusoq tassaavoq, siusinnerusukkut illersornissamut ministeriusimasoq Søren Gade, taanna ullumikkut Kalaallit Nunaanniippoq, ilaatigut illersornissamut ministeri Trine Bramsen IngerForce Grønlandimik ammaajartorluni sisamanngorpat Kalaallit Nunaannukarniartoq ataatsimeeqatigissallugu.

- Najukkmi suliffeqarfiit Kalaallit Nunaanni upalungaarsimanissamut akisussaaqataalernissaat nuannaarutigaara. Kunngeqarfimmi tamarmiusumi Illersornissaqarfiup patajaassusaata nukittorsarneqarnissaa pisariaqartinneqarnerulernikuuvoq, aamma Issittumi Sakkutooqarfiup suliassanik isumaginnittarneranut tunngassuteqartut. Illersornissamut ministerip Trine Bramsenip Kalaallit Nunaanni upalungaarsimanissaq InterForcemik ammaanermigut saqqummilaartilermagu siulittaasutut nuannaarutigaara, minnerunngitsumik suliffeqarfiit qanoq akuliulluartigilereersut eqqarsaatigalugit, Søren Gade Sermitsiaq.AG-mut oqarpoq.