Illersornissaq pillugu isumaqatigiissut: IA-p nakkutilliineq, attaveqaasersuutit aamma nittartakkatigut sillimaniarneq piumasarai

Illersornissaq pillugu isumaqatigiissutissamut, Folketingimi piffissami aggersumi isumaqatiginninniutigineqartussamut, Inuit Ataqatigiit qulequttat salliutinneqartussatut siunnersuutitik pingasunngornermi saqqummiuppaat.

Kalaallit Nunaat siornatigumut sanilliullugu illersornissaqarfimmut ersarinnerusunik aamma politikkimik ersarissumik piumasaqarnissaa, nunarsuarmi pissutsit arlalinnik sorsuttoqarfiunerani aamma Ukrainemi saqitsaattoqarnera, kiisalu Issittup nunarsuarmi tamarmi naalakkersuinermik ingerlatsinermut inissisimanera pisariaqartitsiffiuvoq.

Illersornissaq pillugu isumaqatigiissummut Folketingimi isumaqatiginninniartoqarnissaanut IA siunnersuuteqarnermini tamanna naqissuserpaa. Nunatsinni Folketingimut ilaasortat isumaqatiginninniarnernut taamaattunut siullermeerlutik peqataatinneqarput.

Tunngaviit pingaarnersiuinerillu

IA-mi folketingimut ilaasortaq, Aaja Chemnitz, aamma IA-mi politikkikkut oqaaseqartartoq, Mariia Simonsen, illersornissamut isumaqatigiissutissamut IA-p siunnersuutaanik pingasunngornermi tusagassiorfinnut saqqummiussipput.

Siunnersuut ilaatigut sillimaniarnermut suliassaqarfimmi sulianut tunngavinnut tunngavoq. Ilaatigut Kalaallit Nunaata atomip nukinganik nukissiorfiit, aqqartartut atomimik ingerlateqartut aamma atomimik qaartartut Kalaallit Nunaannut inissinneqanngilluinnarnissaat oqariartutigaat, IA-llu oqariartaatsini ilassuteqarfigaa: Uagut pineqartilluta avaqqunneqartassanngilagut: Kalaallit Nunaat pineqartillugu Kalaallit Nunaat avaqqunneqartarssanngilaq . Nunatsinni illersornissamut politikkikkut suliniutinik suliaqartoqartinnagut, kalaallit tungaannit ersarissumik akuerseqqaartoqartassaaq.

Suliassaqarfiit salliutinneqartut

Suliassaqarfiit IA-p salliutinniagaani Aaja Chemnitzip pingasut erseqqissarpai, taakku illersornissamut isumaqatigiissummut ilaatinneqarnissaat pingaartinneqassaaq.

Nakkutilliineq, nittartakkatigut sillimaniarneq aamma attaveqaasersuutit pingaarutillit soorlu mittarfiit, nerisassanik pilersuinermi isumannaatsuutitsineq, nakorsaatinik imermillu pilersuinerup illersorneqarnissaat.

Aammattaaq digitalitigut sillimaniarnerup annertusarneqarnissaa sulissutigineqassaaq, soorlu assersuutigalugu immap naqqatigut kabelit, tassani immap naqqatigut kabelit amerlanerusut aamma Tunumi Nunattalu Avannaani qaammataasa amerlanerusut IA-p siunnersuutigai.

Nittartakkatigut sillimaniarnermut tunngatillugu Digitalimik Sullissinermut Aqutsisoqarfimmi nittartakkatigut upalungaarsimasunik pilersitsisoqarnissaa partiip kissaatigaa, kiisalu politikerit aamma meeqqat atuarfianni atuartut tikillugit tamanna pillugu ilisimasat annertusineqarnissaat.

Pinngitsaaliissutaanissaa akuerinngikkaat

IA-p siunnersuutaa naapertorlugu Kalaallit Nunaat upalungaarsimanermi, Illersornissami aamma SAR-imi peqataanerulersinneqassaaq, tamatumalu kalaallit amerlanerusut sakkutuujusussaanermik ingerlataqarnissaannik nassataqassaaq aamma JRCC-mi (Joint Rescue Command Center) oqartussaaneq, maanna Issittumi Sakkutooqarfimmit ingerlanneqartoq tiguneqarnissaanik nassataqarpoq.

Kalaallit Nunaannili sakkutuujusussaanerup atulersinneqarnissaanut IA naaggaarpoq.

- Inuusuttut angutit arnallu amerlanerusut piumassutsiminnik sakkutuujusussaanermik ingerlataqartarnissaat takorusuppara. Soqutigineqarluartoq isumaqarpunga, pinngitsaaliissutaanissaa akuerinngilarput, Aaja Chemnitz oqarpoq, taassumalu panini sakkutuujusussaanermik ingerlatsisimasoq kingornalu Danmarkimi nunanut allanut ministereqarfimmi sulisimasoq oqaluttuaraa.

- Sulinerup ingerlaqqinnerani piginnaasanik amerlasuunik pissarsiffiusarpoq.

Suliassaqarfiit arfinillit salliutinneqartut:

• Nakkutilliinerup annertusineqarnissaa
• Nittartakkatigut sillimaniarneq
• Attaveqaasersuutit pingaarutillit illersorneqarnissaat
• Ilinniartitaaneq ilisimatusarnerlu
• Annaassiniartarneq kiisalu upalungaarsimaneq
• Marloqiusamik atuineq – Kangerlussuaq attanneqassaaq sakkutuunit inunnillu sakkutuujunngitsunit atorneqartassalluni. Illersornissaqarfik ingerlatsinermut akiliissaaq.