Illersornissamut ministerip Kalaallit Nunaannut angalanissani kinguartippaa

Illersornissamut ministerip Trine Bramsenip (Soc) Kalaallit Nunaannut angalanissani aappaagumut kinguartippaa. Ataasinngornermi marlunngornermilu angalasussaagaluarpoq.

Angalanissaminik kinguartitsiinnarallarpoq Illersornissaqarfiup ministeriaqarfiani Pigisanik nalilinnik aqutsisoqarfimmi nakkutilliineq amigarsimasoq pillugu aamma peqquserluttoqartarsimaneranik suliamik aallartitsisoqareersorlu.

Illersornissamut ministeri Trine Bramsen oqarpoq kissaatigalugu suliaq piaarnerpaamik paasiniarnissaa, suliarmi Naalagaaffiup kukkunersiuisuinit aamma Naalagaaffiup kukkunersuisoqarfianit tallimanngormat sakkortuumik isornartorsiorneqarpoq.

- Illersornissamut ministeriaqarfiup Pigisanik nalilinnik aqutsisoqarfia sakkortuumik isornartorsiorneqarpoq. Suliaq tamanna pimoorullugu tiguara – kissaatigaaralu piaarnerpaamik qulaajarneqassasoq kissaatigalugulu suliami aaqqissuinissara. Tamassumunnga ilaavoq ministeriaqarfiup suliamik suliarinnissimanera, Trine Bramsen tusagassiutinut nalunaaruteqarluni allappoq.

- Tamanna ajoraluartumik isumaqarpoq Kalaallit Nunaannut sapaatip akunnerata tulliani angalinassaraluara unitsittariaqaringa. Angalaninni qallunaat sakkutuut tikeraartussaagaluarpakka kalaallillu politikerii ataatsimeeqatigalugit. Neriuppunga ukiumi nutaami Kalaallit Nunaannukarsinnaassallunga, oqarpoq.

Qullersani akisussaasoqarpoq

Naalagaaffiup kukkunersiuisoqarfia ilisimatitsivoq Illersornissamut ministeriaqarfiup Pigisanik nalilinnik aqutsisoqarfia paasissutissanik kukkusunik aamma paasissutissanik peqquserlulluni allanngortitanik Naalagaaffiup kukkunersiuisoqarfianut tunniussisimanera pinerlunnerusoq.

Naalagaaffiup kukkunersiuisuisa siulittaasuata, Henrik Thorupip (DF) tamanna tallimanngormat tusagassiortunik katersortitsigami erseqqissarpaa.

- Aap, Naalagaaffiup kukkunersuisoqarfianut eqqunngitsunik peqquserlulluniluunniit allanngortitanik paasissutissanik tunniussineq pineqaatissiissutaasinnaavoq. Naalagaaffiup kukkunersuisoqarfiata allagaatit piumasani eqqortut tigusussaavai.

- Naalagaaffiup kukkunersuisoqarfianut allagaatit peqquserlulluni allanngortitat tunniukkaanni paasissutissallu allat tunniutinngikkaanni, soorunami taava pinerluttuliorneruvoq, Henrik Thorup oqarpoq.

Suliami pineqarpoq Illersornissamut ministeriaqarfiup Pigisanik nalilinnik aqutsisoqarfia aningaasat atornerinut piumasaqaatinut naammaginanngilluinnartumik ingerlasimanera. Tunngavigisat pingaaruteqarluinnartut eqquutsinneqarsimanngillat.

Inuit arlallit piginnaatitaanerminnik atornerluisimasutut akiliillunilu akuersisitsisimasutut maanna unnerluunneqareerput, naammaginanngitsumillu nakkutilliisoqarsimanerata kingunerisaanik aamma pipallatanik sulisoqarsimasoq takussutissartaqarpoq.

Tamanna ajorluinnareerpoq, kisiannili Naalagaaffiup kukkunersuisui aamma Naalagaaffiup kukkunersuisoqarfia naapertorlugit Illersornissamut ministeriaqarfiup Pigisanik nalilinnik aqutsisoqarfia “paasissutissanik naammaginanngitsunik eqqunngitsunillu” kukkunersuisoqarfimmut tunniussisimavoq.

Allagaatinik peqquserlulluni allanngortitsineq

Suliami pineqartut ilagaat assilisat peqquserlulluni allanngortinneqarsimasut, tallimanngornermi tusagassiortunik katersortitsisoqarnerani paasinarsivoq.

- Nalunaarusiami tassunga killikkama allattariaqarsimavunga tamanna quarsaarnarluinnartuusoq. Taamaattunik nalaataqarnikuunngisaannarpunga. Ukiuni 20-ni naalagaaffimmi kukkunersuisuuvunga, taamaattunillu takunikuunngisaannarlunga. Tupannarpoq.

- Paasissutissat eqqunngitsut aamma paasissutissat peqquserlulluni allanngortinneqarsimasut pineqarput. Taakkunani ilaapput allattaaviit peqquserlulluni atsiornermik issuaalluni atsiorneqarsimasut, Henrik Thorup tusagassiortunik katersortitsinermini oqarpoq.

Naalagaaffiup kukkunersuisua Frank Aaen (Ø) oqarpoq suliami inuit unnerluunneqareersut saniatigut suli inuit allat aamma eqqorneqassasut.

- Oqartoqarsinnaavoq suliami inuit maanna unnerluunneqarsimasut taakkuunngimmata kisimik pineqartut. Aaqqissuussaanermi inuit akisussaaffeqarnerusut aamma eqqorneqartussaapput.

- Qulaani akisussaaffeqartoqarpoq. Peqquserlunnissamut periarfissaqarneq atornerlunneqarmat, tamanna assuarnarpoq. Aammali peqquserlunnissamik periarfissamik ammaassisoqarsimanera, peqquserluttoqarneranillu toqqorteriniarluni paasissutissanik eqqunngitsunik tunniussisoqarsimanera, tamanna aamma assuarnartuuvoq, Frank Aaen oqarpoq.