Illersornissamut ministeri: Kangerlussuup matuneqarnissaa pilersaarutigineqanngilaq
Kangerlussuup siunissami qanoq atorneqarnissaa pilugu illersornissaqarfik Namminersorlutillu Oqartussat tunngaviusumik isumaqatigiissut ukiamut saqqummiutissavaat
Kangerlussuarmi timmisartoqarfik illersornissaqarfiup Kalaallit Nunaanni suliassaminik isumaginninnissaanut pingaaruteqarpoq, illersornissamut ministerip Trine Bramsenip (Soc) folketingip Kalaallit Nunaannut tunngatillugu ataatsimiititaliaani ammasumik isumasioqatigiittoqarmat naqissuserpaa.
- Kangerlussuup matuneqarnissaa pilersaarutigineqanngilaq, Aaja Chemnitz Larsenip (IA) isumasioqatigiittoqarnissaanik qinnuiginnissimasumut akissuteqarluni taamak oqarpoq.
Trine Bramsenip nassuiaatigaa, illersornissaqarfiup timmisartoqarfiit nutaat Issittumilu ineriartorneq eqqarsaatigalugit siunissami pisariaqartilerumaakkani misissorsimagai. Kangerlussuarmi silap allanngujaattuunera illersornissaqarfiup timmisartuutaanut inuinnaat timmisartuutaannik mikinerukkajuttunut pingaaruteqartoq.
- Kangerlussuaq pingaaruteqarpoq, illersornissaqarfiup timmisartuutaasa pisariaqartitsisoqartillugu timmisinnaanissaannut. Ilaatigut annaassiniartartut upalungaarsimanerannut tamanna pingaaruteqarpoq, taanna oqarpoq.
Ukiap ingerlanerani isumqatigiissuteqartoqassaaq
Illersornissaqarfiup februaarip qaammataani nalunaarutigimmagu, Kangerlussuarmik atuinissaq suli soqutigineqartoq, illersornissaqarfik Namminersorlutillu Oqartussat suleqatigiissitanik pilersitsipput. Ukiap ingerlanerani aallarniutitut oqaloqatigiinnerit arlallit ingerlanneqarsimapput. Ataatsimiititaliami ataatsimeeqatigiinneq siulleq aggustusip 25-ani Kangerlussuarmi ingerlanneqarpoq.
- Illersornissaqarfik sunik kissaateqarnersoq oqaluuserisimavarput, aammali Namminersorlutik Oqartussat pisariaqartitaat oqaluuserisimallutigit. Soorunami inuinnaat Kangerlussuarmik suli atuisinnaanerat akuersaarparput, Trine Bramsenip nalunaarutigaa.
Kikkut akiliissappat?
Skunissami ingerlatseriaasissaq qanoq isikkoqassanersoq maannakkorpiaq oqaatigisinnaanngilaa. Aamma nutarterinissat pisariaqartineqartut kiisalu siunissami ingerlatsinissat kikkunnit akilerneqassanersut maannakkut oqaatigisinnaanngilaa. Kangerlussuarmut tunngatillugu kalaallinit kissaatigineqartut pillugit Namminersorlutik Oqartussanit nalunaaruteqartoqarnissaa illersornissaqarfimmit utaqqimaarneqarpoq.
- Kangerlussuup siunissaa pillugu ukiap ingerlanerani tunngaviusumik isumaqatigiissuteqarnissarput naatsorsuutigaarput. Tamatuma kingorna ingerlatseriaasissaq aalajangersarlugu aallartissaagut.
Trine Bramsenip aamma maannakkorpiaq oqaatigisinnaanngilaa, USA Kangerlussuarmi aningaasaliissuteqarusussanersoq.
- Amerikamiut Kalaallit Nunaanni timmisartoqarfinnut aningaasaliissuteqarnissamik soqutiginnillutik nalunaaruteqarmata, taamatut aningaasaliissuteqarnerit timmisartoqarfiit nutaat aaqqissugaanerannut naapertuuttumik aningaasaliissuteqartoqartariaqartoq nalunaarutigaarput.