Illersornissamut ministeri: Issittumi sakkutooqarnikkut annertusaassanngilagut

Illersornissaqarfip isertortumik paasiniaasartuisa nalunaarusiaminni allappaat, Ruslandip annertuumik ernumassutigigaa Amerikamiut nunaniluunniit killerni nunat allat Issittumi sakkutooqartoqarnerminnik annertusaanerat

Amerikamiut Issittumut Kalaallillu Nunaannut tunngatillugu soqutiginnikkaluttuinnarnerat Ruslandimiunit nuannerineqanngeqaaq. Aamma Danmarkip siunertai qularnartoqartippaat. Peqatigitillugu Rusland nammineerluni Issittumi sakkutooqarnerminik annertusaasimavoq. Illersornissaqarfiup Isertortumik paasiniaasartui (FE) nalunaarusiaminni kingullermi taamatut allapput.

- Rusland Issittumi nammineq sakkutooqarnerminik annertusaagaluaruniluunniit, Amerikamiut imaluunniit nunat killiit allat Issittumi sakkutooqartitsinerat ernumassutigissavaa, tassa russit namminneq isumaat malillugu, nunap avannarpasissortaanik illersuisinnaanerat ulorianartorsiortinneqassammat, FE allappoq.

USA-mi kongressip Pentagon juunip 27-ani peqqusimavaa, ullut 180-it ingerlaneranni Issittumi sorsuutit umiarsulivissaannut nutaamut inissamik nassaarniaqqullugu. Tamanna Issittup suatungaaniissanersoq suli ilisimatitsissutigineqanngilaq.

Mianersornissaq

Ruslandip nammineq sakkutooqarnikkut annertusaanera, imminut illersorniarnertut, aammali saassussiniarsinnaanertut FE-mit suli isigineqarpoq. Tassa russit timmisartuisa sorsuutit Nagurskoye Basenimit Kalaallit Nunaat Pituffillu angusinnaavaat.

Taamatut inissisimasoqarnerani, Issittoq sorsuffiunngitsutut attatiinnarneqassappat Naalagaaffeqatigiit eqqarsaqqissaartariaqarput, illersornissamut ministeri Trine Bramsen (Soc) erseqqissaavoq.

- Akerleeriissutaasinnaasut akornanni suliassaq oqimaassinnaavoq. Mianersoqqissaartariaqarpugut, Sermitsiaq.AG-mut oqarpoq.

Danmarkimut tunngatillugu qularuteqarneq

Amerikamiut iliuusaat kisimik Ruslandimit nakkutigineqanngillat. Aaama Danmarkip NATO-milu iligiit sulerinersut nakkutigineqarput.

- Ruslandimi qitiusumik aqutsisut atorfilittallu sillimaniarnerup illersornissamullu tunngatillugu ingerlatsisut, Danmarkip iligiillu Issittumut tunngatillugu siunertaannik qularuteqarput, Ruslandip Issittumi sakkutooqarrnerminik annertusaanerminut peqatigitillugu issittumi naalagaaffiit sineriallit suleqatigalugit sumiiffimmi suliarisartakkani annertusaaffigai, FE nalunaarusiamini allappoq.

Sakkutooqarnikkut annertuumik ikorfartuisoqassanngitsoq

Tamanna aamma pissutigalugu illersornissamut ministerip piffissannginnerarpaa, umiarsuarnik allanik imaluunniit sakkutoorpassuarnik Kalaallit Nunaannukartitsinissaq.

- Taamatut inissisimasoqarnerani, sakkutoorpassuarnik Kalaallit Nunaannukartitsinitsigut pissutsinutt sakkortusaaqataassanngilagut. Annertusaanissaq pinngitsoortissavarput, Issittumi sungiusartarnerit saniatigut NATO-mi tamarmi annertuumik suliniuteqarnitsigut, Trine Bramsen oqarpoq.

Soorlu siusinnerusukkut oqaluttuarereeripput, illersornissamut ministerip Kalaallit Nunaata imartaani nakkutiginninnerup annertusarneqarnissaa salliutinniarpaa. Ruslandip nunallu allat Kalaallit Nunaata eqqaani angallannerat pillugu eqqornerusumik ilisimasaqalernissaq aatsaat taamak pingaaruteqartigaaq.

- Tamanna uagutsinnut annertoorujussuarmik piumasaqartitsivoq, mianersortariaqarpugullu, mianersuaalliussanngilangummi. Taamaammat eqqarsaatigeqqissaartariaqarparput, sakkutooqarnikkut suut ikiuutissatut nassiutissanerlutigit aamma qanoq takutitsinerluta.

Powered by Labrador CMS