Illersornissamut ministeri: Erfalasorput alapernaarsuisartut Siriusikkut qamutaanni takuneqarsinnaanngussaaq
Dannebrog Erfalasorpullu alapernaarsuisartut qamutaanni siunissami sanileriittut takuneqarsinnaasariaqarput, Danmarkimi naalakkersuisut taamatut isumaqarput
Alapernaarsuisartut Siriusikkormiut Tunup Avannaarsuani nunami eqqissisimatitami alapernaarsuillutik angalagaangamik qamutaanni Dannebrog takuneqarsinnaajuaannarpoq. Siunissamili danskit erfalasuat Erfalasorpumik ilaqartinneqartalissaaq. DR taamatut allappoq.
- Taamaaliorniarnitsinni siullertut takutikkusupparput, Kalaallit Nunaanni suleqativut peqatigalugit isumannaatsuunissamik toqqissisimanartuunissamillu isumaginnikkusunnerput. Peqatigiilluta kivitseqatigiissaagut ataatsimoorlutalu akisussaaffeqarluta, illersornissamut ministeri Trine Bramsen (Soc) DR-mut oqarpoq.
Siriusikkormiut 1952-imili Dannebrogimik atuisimapput.
Alapernaarsuisartut arfinilinnik qamuteqarput marlunnik inuttaqartartunik aqqaneq-marlunnillu qimuttoqartartunik. Pingaarnertut suliassaraat Tunup avannaarsuani danskit oqartussaaffiannik nakkutiginninnissaq, aammali Nunami eqqissisimatitami politiitut atuuttuupput.
Alapernaarsuisartut Siriusikkut Illersornissaqarfimmi Jægerkorpsert aamma Frømandskorpset assigalugit immikkut ittumik suliaqartartuupput.