Skip to main content

Illersornissamut ministeri: Arktisk Kommandomi kalaallit amerlanerit pisariaqartinneqarput

Sakkutuunngorniartarneq Kalaallit Nunaanni aallartilinnguatsiarpoq. Trine Bramsenip kalaallit inuusuttut illersornissaqarfimmi ilinniagaqarnissamut pilerisaarpai

Illersornissaqarfik Issittoq pillugu ilisimaqarnissamik pisariaqartitsivoq, ilisimasaqarneq issittumi peroriartorsimagaanni taamaallaat pissarsiarineqarsinnaasoq. Taamatut isumaqarpoq illersornissamut ministeri Trine Bramsen (Soc).

- Issittumik paasisimasallit amerlanerit illersornissaqarfiup Kalaallit Nunaanniinnerani suleqataatikkusuppakka. Issittumut tunngatillugu immikkut ilisimasat Illersornissaqarfiup suliarisinnaasaanut ataatsimoortikkusullugit, taanna Sermitsiaq.AG-mut oqarpoq.

Taanna isumaqarpoq, Issittumut tunngatillugu ilisimasaqartut amerlanerit, Kalaallit Nunaanni aalajangersimasumik najugallit, illersornissatigut ilinniagaqarsinnaanerat Arktisk Kommandomut iluaqutaalluassasut.

- Tamanna danskit illersornissaqarfiannut iluaqutaaginnarani, aammali Kalaallit Nunaanni inunngorlunilu alliartorsimagaanni taamaallaat ilisimaneqartartut Kalaallit Nunaannut iluaqutaassapput.

- Ilinniagaqareernerup kingorna Kalaallit Nunaanni najugaqarnissaq aalajangeraanni aamma iluaqutaassaaq, taamaalillunimi illersornissamut ilinniagaqarsimasut amerlanerit Kalaallit Nunaanni najugaqalissagamik, illersornissamut ministeri taamak isumaqarpoq.

Sakkutuujusussaaneq Kalaallit Nunaanni aallartinneqartoq

 Illersornissaqarfiup kalaallit inuusuttut najukkaminni sakkutuunngorniarsinnaanerat siunnerfigalugu siorna siullermeerluni neqerooruteqartarnissaq aallartippaa. Tamatuma malitsigisaanik inuusuttut 20-t missaanniittut qinnuteqarsimapput.

Maannalu Trine Bramsenip sulissutigaa, suli amerlanerusut ilinniagaqalertarnissaat. Taamaammat Namminersorlutik Oqartussat peqatigalugit danskit/kalaallit ataatsimoorlutik ilinniagaqarnissamut atatillugu oqallittarfissaat pilersissisimavaa, taanna aqqutigalugu ilaatigut kalaallit inuusuttut siunnerfigalugit sakkutuunngorniartitsisarneq misissorneqassaaq.

- Qanoq isikkoqassappat? Qanoq iliorluta kalaallit inuusuttut amerlanerit illersornissaqarfimmut soqutiginnitsilersinnaavagut? Inuusuttut najugaqarfiinut qaninnerusuni ilinniagaqarnissamut neqeroorfigisarlugit ilinniagaqarusuttut amerlanerulersissinnaavagut?

Trine Bramsenip takorloorpaa, ilinniagaqarnerup aallaqqaataata tungaa Kalaallit Nunaanni ingerlanneqarsinnaasoq.

- Ilimaginngilara maannakkorpiaq Kalaallit Nunaanni tamakkiisumik sakkutuunngorniartitsisinnaalluta, imaassinnaavorli Kalaallit Nunaanni ilinniarnermik aallartitsisoqarsinnaasoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER