Iliveqarfik kikkunnut tamanut atuuppoq
Iliveqarfik ilagiinnut ilaasortanut kisimi atortussaatinneqarunnaarpoq. Taamaattumik aamma allatut taaguuteqalertariaqarpoq. Palasip Aviaja Rohmann Hansenip siunnersuutigaa »ilisisarfik«.
- Misigisarparput inuit oqaluffimmit ilisaajumaneq ajortut, aperalutillu taava sumi naggataamik qasuersaassanerlutik. Nuummi palasi Aviaja Rohmann Hansen aviisimut AG-mut taama oqarpoq.
- Tamarmik iliveqarfimmi ilisaajumaneq ajorput, inatsisikkulli aalajangersagaavoq iliveqarfimmi ilineqartarnissaq. Taamaattumik immaqa allatut taaguuteqalertariaqarpoq. Iliveqarfimmik taanagu immaqa ilisisarfimmik taaneqarsinnaavoq. Taamaalilluni iliveqarfik isigineqarunnaassaaq ilagiinnut ilaasortat kisimik ilisaaffigisinnaasaattut. Tassanikikkut tamarmik ilineqarsinnaavoq, palasi erseqqissaavoq.
Iliveqarfik qanga oqaluffinnit ingerlanneqarsimavoq, taamaattumik taamatut taaneqartarpoq.
Taamanikkut killersorneqarsimavoq kikkut iliveqarfimmi ilineqarsinnaanersut, taamaallallu ilagiinnut ilaasortat kisimik tassani ilineqarsinnaallutik. Taamaakkunnaarsimavoq. Ullumikkut kommunit iliveqarfiit ingerlataraat oqaluffillu avaqqullugu ilisisoqarsinnaavoq.
- Ilagiit iliveqarfik aqutariinnarpaat. Toqusut tamaasa nalunaarsortarpavut. Aamma ilagiinnut ilaasortaanngitsut. Kikkut tamarmik, qanorluunniit upperisallit, ilerrup normuanik pilerneqartarput, qimagaasullu namminneq aalajangissavaat ilerrup normua ujaqqamiissanersoq, sanningasumiissanersoq imaluunniit qisummut assigisaanulluunniit allassimassanersoq. Ilisimaniassagatsigu kina sumi ilineqarsimanersoq, taanna oqarpoq.
Aviisimi AG-mi allaaserisaq tamakkerlugu atuarsinnaavat. Aviisi uani pissarsiariuk: