Iliuusissatut pilersaarut meeqqat illersuisuannit isornartorsiorneqartoq

Naalagaaffiit Peqatigiit meeqqat pillugit isumaqatigiissutaannik naammassinninnissamut iliuusissatut pilersaarummik 2023-miit 2030-mut atuuttussamik Naalakkersuisut saqqummiussingajalerput.

Iliuusissatut pilersaarut suli saqqummiunneqanngilaq. Taamaattoq meeqqat illersuisuat Aviâja Egede Lynge, unikaallaqqusilereerpoq. Iliuusissatut pilersaarut isumaqatigiissutinik malinninnissamut qulakkeerinnittussatut isikkoqanngilaq, taanna isumaqarpoq.

- Ukiorpaalunni iliuusissamik pilersaarummik siuarsaartaasinnaasumik ujartuilluta oqaaseqartarsimavugut, meeqqanut naalakkersuinikkut anguniakkanik ataqatigiissaarinissaq isumageqqullugu, apeqqutaajunnaarsillugu naalakkersuisut kommunalbestyrelsillu taarsertaqattaartut. Iliuusissatut massakkut pilersaarutaasoq massakkutut isikkoqartillugu siuarsaataasinnaanngilaq, Aviâja Egede Lynge oqarpoq.

Nutaamik nalilersorneqarli

Iliuusissatut pilersaarut susassaqartunut 3. november tikillugu tusarniutigineqarsimavoq. Imarisaali meeqqat illersuisuata nuannaajallaatiginngilaa. Meeqqat illersuisuata iliuusissatut pilersaarutip imarisaani suliniutaareersut nassuiarneqartut oqaatigaa, pilersaarullu naammaginanngitsutut kisimiitillugulu atorsinnaanngitsutut nalilerlugu.

- Ukiut tulliini pilersaarummi suliniutit aallartereersut nassuiarneqaannarput. Uagut angalasarnitsinni naalagaaffiit peqatigiit meeqqat pillugit isumaqatigiissutaanni artikelip 19-it nunatsinni naammassineqarsimanngitsut uppernarsaateqartillugit nalunaarutigisareerpagut. Taakkuli ajornartorsiutit iliuusissatut pilersaarummi toqqaannartumik taaneqanngillat. Naluarput inatsisartut, naalakkersuisut, kommunit, nunaqarfiit, illoqarfiit, politiit, peqqinnissaqarfik, atuarfik, ilaqutariit, angajoqqaat innuttaasullu ataasiakkaat qanoq iliussanersut, isumaqatigiissummi malitassatsinni 19-it naammassineqarsimanngtisut nunatsinni atuutsilissagutsigit, Aviâja Egede Lynge Sermitsiaq.AG-mut oqarpoq.

Meeqqat illersuisuata kissaatigaa iliuusissatut pilersaarut nalilersorneqaqqittariaqartoq, pilersaarutillu ilusilersornerani kommunit innuttaasullu peqataatinneqartariaqartut. Iliuusissatut pilersaarut januar 2023-mi atuutilersussatut naatsorsuutigineqarpoq.

Iliuusissatut pilersaaruteqarnissaq pisariaqarluinnarpoq

Aviâja Egede Lyngep erseqqissarpaa iliuusissatut pilersaaruteqarnissaq pisariaqarluinnartoq, pilersaarulli siumut anguniagassanik siunertaqartariaqartoq.

- Inuiaqatigiinni ilumoorluta allannguiniarutta taava Naalakkersuisut iliuusissatut pilersaarusiortariaqarput, sumukarnissamik tikkuartuisumik, nutaaliortumik aamma nuna tamakkerlugu pisumi ataqatigiissaarisumik. Nuna tamakkerlugu iliuusissatut pilersaarummik ajunngilluinnartumik peqalernitsinni taava sumi tamani asuli qamitsiterisarnerput qimassagaluarparput piuaannartitsinikkullu siumut ingerlaasissamik nassaarsinnaanngussalluta, oqarpoq nangillunilu:

- Nalilersueqqinneq annertoorujussuarmik atorfissaqartippaput iliuusissatut pilersaarut atuutsilersinnagu, aamma soorunami ilisimasavut suliassami tunniussinnaavagut. Tamatta soqutigisarivarput iliuusissatut pilersaarut nukittuumik nunatsinnullu sorlaqarfiulluartumik sanaajuppat, taamaalilluni ukiuni tullinnguuttuni meeqqanut inuusuttunullu suliniuteqartunut annertuumik tunngaviliissammat.

Meeqqanut, inuusuttunut ilaqutariinnullu naalakkersuisoqarfik ilisimatitsivoq iliuusissatut pilersaarutitut siunniussaq ilusilersorlugu naammassineqanngitsoq tusarniutigineqartoq meeqqat illersuisuata akissuteqarfigisarigaa. Naalakkersuisoqarfiup qulakkeerniarpaa iliuusissatut pilersaarummi tusarniutigineqarnermi akissutit ilanngunneqarumaartut. Taassuma kingorna naalakkersuisut akuerseqqaassapput naggataatigullu inatsisartunit aamma akuerineqaqqaassalluni, atuutilersinnagu.