Ilitsersuut: Igasup ukiutoqqamut nerisassiai

Igasunngorniaq 31-nik ukiulik Kristiane Andersen Sisimiormiu, iggavimmi sulitilluni ulapingaatsiartarpoq. Kusassaallaqqippoq, pitsaalluinnartunillu nerisassiortarluni. Qiimasuuvoq – assilitinnissaminilu qungujunnissaq piffissaqarfigaa.

Kristiane Andersen ukiut sisamat matuma siorna Aalborgimi Foodtech Collegemi igasunngornialernerminiilli nerisassiortaatsit assigiinngitsut arlallit ilinnialersimavai. Kalaallillu inuusuttut Nordjyllandimi Arctic Street Foodimi puisip neqaanik sassaalliinerat peqataaffigisarpaa, taassuma saniatigut Aalborgimi Folkekirkens Husimi Verdenskøkkenet nunarsuaq tamakkerlugu nerisassianik misileraatitsineq aaqqissueqataaffigisarlugu.

Nunani allani sulisimasoq

Kristiane Andersen Food College Aalborgimi igasunngorniatut suli naammassinngikkaluarluni nunani allani sulinermik misilittagaqalereersimavoq. Taassuma oqaatsitigut aporfiusinnaasut uniffiginagit nunarsuaq angalaffigisarpaa.

- Inuusuttuunerup nalaani sapinngisamik amerlanerpaat misilerarneqassapput. Periarfissat takkutsillugit atorluarneqartassapput, taanna oqarpoq.

Taassuma igasunngorniarluni suliffimmik misiliinera siulleq Bodømi pivoq, neriniartarfimmi asiamiut nerisassioriaasiat atorlugu iggavimmi sulisimalluni. Suliffimmik misiliinerata tullia Frankrigimi pivoq, tassani franskit kusanarluinnartumik nerisassioriaasiat Provencemi neriniartarfimmi Michelinitalimmi ilinniarfigisimavaa.

Kristiane Andersenip upernaaru inaarutaasumik misilitsinnginnermini naggataamik suliffimmik misiliineq maanna ingerlappaa. Misiliineq Aalborgimi neriniartarfiit ilisimaneqarluarnerpaat ilaanni Mortens Kromi ingerlappaa.

Suleqatiminut isumassarsiortitsisoq

Kromik piginnittup Morten ”Kok” Nielsenip iggavimmini kalaallimik sulisoqarnera assut nuannaarutigaa.

- Kristiane sulisutsialaannaanngilaq. Tamaanimi sulisugut tamatta assut isumassarsiorfigisarparput. Kristiane kalaallit pisuussutaannik iggaviinillu ilisimasaqarluarnera ilinniarfigilluartarparput, iggaviup pisortaa oqarpoq.

Sermitsiaq.AG-p Kristiane Andersen piumaffigaa ukiutoqqami nerisassianik festerpalaartunik, mamarunartunik ajornanngitsunillu sananeqarsinnaasunik toqqaaqqullugu. Ilitsersuutit uani atuarsinnaavatit.

Nerisassat

Nerisassat tassaapput, kapisilik pujuugaq pannakaalerlugu, culottestegi akuutissartaalu kiisalu kalaalerpaluttumik kuannit qajaasallu atorlugit paarnarnik tærteliaq.

Ilitsersuutit:

Kapisilik pujuugaq pannakaalerlugu

3dl immuk, 1⁄2 dl creme fraiche, 15 g qapuaqqat, 1⁄2 alussaateeraq taratsut, 1 1⁄2 alussaateeraq sirup imaluunniit honningi, 90 g qajuusat, 90 g boghvede, 1 1⁄2 manniup qaqortortai, 1 1⁄2 manniup aappaluttortai

- Immuk uunnaguk creme fraichelu inip kianneratut kissarneqartilerlugu

- Qapuaqqat, honningi, manniup aappaluttortai, qajuusat taratsullu akulerullugit aalatikkit. Minutsini 15-ini uninngatiguk.

- Manniup qaqortortai aalatikkit dejemullu akulerullugit

- Pannakaat punnermut sianneqassapput, diameteria 5-10 cm missaanniissallutik. Naammassippata kapisilimmik pujuukkamik sassaallerneqassaaq kapisiliullu suaanik, syrnet flødemik purløgimillu kusassaaserneqassallutik.

Culotte kissarneqarpallaanngitsumik qajulerlugu siataq, gulerodimik, appelsinamik kusassaasersugaq rødviinnimillu miseralik.

Culotte kajortillugu sianneqassaaq, siareerpat gulerøddinik, porrenik, uanitsunik, hvidløginik timianinillu akulerullugit bradepandemut ikineqassaaq. Naasut rødviinnimik kuikkit nalunaaquttallu akunnerata affaata missaani 140 gradimi ovnikkut sianneqassalluni.

Gulerodi: Gulerodi tallimanngorlugu patea tikillugu kitserneqassaaq. Bradepande groft saltinik nakkalaartariarlugu gulerodit ilineqassapput, 180 gradimilu minutsini 20-ni kissanneqassaaq. Gulerodit imermi nillertumi nillorserneqassapput. Mianersortumik gulerodip patea savimmik peerneqassaaq kingornalu imermi qalaartumi minutsimi ataatsimi uunneqassalluni.

Appelsinat qalipaajarneqassapput kitserneqarlutillu. Siatsivikkut qalipaataat allanngortilaarlugit sianneqassapput. Naatsiianik uunnaasoqassaaq. Sassaalliinnginnermilu punnermut timianitalimmut sianneqassallutik.

Rødviinnimik miseqqiaq: Punneq 50 grammi (kajortinnagu) aatsinneqassaaq, qajuusat 50 grammi akulerunneqassapput sakkukitsumillu kissanneqassalluni. Minutsini arlaqanngitsuni uninngatiguk kingornalu rødviinni culotteminngaanneersoq akulerullugu aalanneqassaaq. Taratsunik qasilitsunillu marmasaaseruk.

Kinguleraq

Paarnanik tærteliaq – assersuutigalugu, paarnanik kigutaarnanilluunniit – kuanninik sabayonnenillu akuugaq.

120 g punneq, 80 g flormelis, 30 g mandelmel, 1 æg, 1⁄2 vanillestang, 235 g qajuusat, 1⁄2 alussaateeraq taratsut.

- Punneq, flormelis, mandelmel, mannik, vaniljekorn aamma 60 gr qajuusat skålimut akulerunneqassapput assannillu naqittarneqassallutik.

- Aalaternera naammassippat qajuusat sinneruttut 175 gr taratsullu akulerunneqassapput. Sukkasuumik torersumik aalaterneqassaaq.

- Naqittagaq bagepapirinut qaleriinnut marlunnut 2,5 mm-imik issutigisunngorlugu siaarneqassaaq. Naqittagaq plademut mikisumut ilillugu akunnermi ataatsimi nillataartitsivimmiitinneqassaaq.

- Tærteliassaq tærteformimut siaartiguk – naqittagaq nerrivimmiiteqqaarsimagaanni ajornannginnerusarpoq. Naqittagaq formip sinaanut mianersortumik peqiteruk. Formip qaava kagerulle atorlugu naqittagaq ilanngarteruk sinneralu assannik aaqqillugu. Naqqa ajassaammik putujuk imassaatalu suliarinerani minutsini 30-ni nillataartitsivimmiitillugu.

Philadelphia-creme
200 gram philadelphia
100 gram sioraasat
2 manniit
20 gram qajuusat
3⁄4 dl cremefraiche
Akuutissat akulerullugit aalanneqassapput tærteliorfimmullu kuillugit. Nalunaaquttap akunnerata missaani 170 gradimi uunneqassaaq.

Qajaasat-gele

Qajaasat minutsini marlunni imermik kissanneqassapput. Husblasi qajaasat qajuanik deciliterip affaanik akullugu minutsini tallimani aatsinneqassaaq kingornalu igamut kuineqassaaq qajaasallu akulerullugit.

Tærte paarnanik – assersuutigalugu paarnanik, kigutaarnanik kirsebærinilluunniit – kusassaaseriarlugu qajaasat kuineqassapput. Issortitaata issornissaata tungaanut nillataartitsivimmiitinneqassalluni.

Kuanneq Sabayonne

150 gram flormelis

3 1⁄2 dl kuannimik saftiliaq. (Kuannerit minutsini tallimani imermik qalaanneqassapput.)

8 manniup aappaluttortai

Akuutissat mianersortumik uunneqassapput – qalaanneqassanngillat. Miseqqap naammassinissaata tungaanut aalaterneqassaaq. Sabayonni skålimik sassaalliutigineqassaaq.