Ilitsersuisup danskit isummiussereertarnerannik allannguiniarpoq
Københavnimi Grand Biomi inersuarmi ulikkaaqqasumi 'Lykkelænder' Lasse Lauimit filmiliaq takuteqqaarneqarpoq.
Inuit 250-t missaanni amerlassusillit filmi ’Lykkelænder’ takuniarlugu, sapaammi Københavnimi Grand Biomiipput. Ersaattaattoqarnera naapertorlugu filmi isiginnaartunit nuannarineqarpoq.
Ilitsersuisoq Lasse Lau aamma pilluaqquneqarluarpoq, taassumalu filmip maanna takutinneqarnera nuannaarutigigaa takuneqarsinnaavoq.
Isiginninneq tusagassiorfinnit pilersinneqartoq
- Suliaq ilungersuussimasaq maanna naammassisoq takullugu iluarisimaarnarpoq, taanna Sermitsiaq.AG-mut oqarpoq.
Lasse Lauip Nunarput pillugu filmiliornissamut isumassarsiaa ukiut arlallit matuma siorna pinngorpoq, taamaammat filmip inerlugu suliarinissaanut sivisusimavoq.
- Angalaneq maanna naammassisoq eqqarsaatigalugu annertuvoq, taanna oqarpoq.
Lasse Lauip filmi suliaralugu aallartikkamiuk Kalaallit Nunaat pillugu ilisimasaqarpianngilaq, naak kalaallinik marlunnik atuaqateqarnikuugaluarluni. Paasilerpaa atuarfimmi filminit isiginnaakkaminit ilisimasai aallaaveqartut. Taamaammat taassuma Kalaallit Nunaannik isiginninnera avataanit paasisimasaqanngitsumit isiginninnerulluni. Filmimilu tamanna aallaavigineqarpoq.
- Danskinik nikisitsinissara anguniagaraara. Kalaallinut qanoq isiginnittarnitsinnut imminut qivialaartariaqartugut isumaqarpunga. Isornartorsiortumik qiviarnissaanut piffissanngortoq isumaqarpunga.
Nukâka aamma Vivi Nielsen workshopeqatigalugit.
Kalaallit Nunaat paasisaqarfigiumanerullugu Lasse Lauip isiginnaartitsisartut Vivi Nielsen aamma Nukâka CosterWaldau suleqasiuppai, taakku marluullutik filmimi peqataapput.
- Aallaqqaataaniilli allamit sammivimmit isiginnissinnaasumik peqataatitaqarnissarput ilisimavarput. Taamaammat taakku peqatigalugit filmip ineriartortinneqarnerani workshoppertitsivugut. Suliarinera tamakkerlugu immitsinnut nakkutiginissarput pingaartissimavarput. Tassami ilaatigut aliasutsitsigaangatta tamakkiisumik isiginninngitsoortarpugut.
Apeqqusiisoq
Isiginnaartut filmip ersarissumik ‘danskit isummiussereertarnerat immaappoq’-mik naatsorsuuteqarunik pakatsissapput. Filmi takusassianik assigiinngitsunit imaqarpoq, merlanerillu pisuusaartitaallutik. Taakku pinngortitamik alutornartumit immiussanit taarserneqartarput.
- Oqallinnermik aallartitsinissannut tunngassuteqarpoq, taamaaliorsinnaagumalu nuannaarutigissavara, Taamaattumik ammanerusumik isiginnaagassiorpunga. Filmi imatut paasissagit oqaaseqartoqanngilaq.
Alianalaartoq
Isiginnaartitsisartut Vivi Nielsen aamma Nukâka CosterWaldau aamma Angunnguaq Larsenip saniatigut Aannguaq René Hansen peqataavoq. Tamatuma saniatigut kalaallit meeqqat inersimasullu ilaallatsiarput. Pipaluk K. Jørgensen aamma Emile Hertling Péronard suliarinneqataapput.
- Angalaneq ilikkagaqangaatsiarfiuinnarani inunnik nuannarisarpassuannik naapitsiffiuvoq. Taamaammat tamaanga killinnera aamma alianalaarpoq, Lasse Lau oqarpoq.
Filmi ‘Lykkelænder’ Cph:Doximut atatillugu takutinneqarpoq. Taanna Nordic:Doc Awardsimut innersuunneqarpoq. Pingasunngorpat filmi takunissaanut aamma periarfissaqarpoq.