Ilisinerni immikkut akuersiissutinik tunniussisoqarneq ajortoq
Palaseqarfiup maleruaqqusat malippai, assersuutigalugulu ilisinermi inuit qulingiluaannaat najuussinnaapput
Coronavirusimik tunillaassuuttoqannginnissaa anguniarlugu amerlanerpaamik inimi inuit qulit isersimasinnaatitaapput.
Ilisinernimi?
Tamanna paasiniarlugu Nuummi Palaseqarfik paasiniarneqarpoq.
- Oqartussat maleruaqqusaat malittussaavagut, taamaattumik ilisinerni inuit qulingiluaannaat peqataasinnaapput, palasi imaluunniit ajoqi ilanngunneqartussaanerat pissutaalluni. Taamaattumik ilisinerni immikkut ittumik akuersiisoqarsinnaanngilaq, Nuummi palaseqarfimmit Aviaja Rohmann Hansen Sermitsiaq.AG-mut oqarpoq.
Katittussaagaluit aamma kuisitsisussaagaluit arlaqartut kinguartitsisimasut ilisimatitsissutigaa.
- Ilaqutariit ataatsimuunnginnissaat anguniarlugu taamatut aalajangertut arlaqarput - ilaquttalli aamma tikissinnaannginneri pissutigalugu kinguartitsisoqarluni, ilisimatitsivoq.
Apersortittussat juunimut kinguartinneqareersut oqaatigaattaaq.