Ilisineq alianartoq: Iliveq ilineqarami puttasoq
Paamiuni ilaqutariinnut maajimi ilisineq nuanniitsuuvoq, tassami illoqarfiup iliveqarfia ilinernut tulluanngilluinnarpoq
Paamiuni peroriartortoq Christian Bork qatanngutini ilagalugit ilisiartoqarpoq maajimi. Tassami Paamiuni iliveqarfimmi nutaami anaanaa ilisaavoq.
Misigisaq nuanniitsoq
- Ilineqartussanngormat ilivissaata naqqani 30-40 centimeterimik imeqarpoq, assaasut imeqannginnissaa sulissutigisimagaluarlugu. Kisianni imaarunnissaa ajornakusoortissimavaat, Christian Bork Sermitsiaq.AG-mut oqarpoq.
- Ilineqarami soorlu umiarsuaq imarmut ilineqartoq, imaarunnissaa anguniarlugu issunik immerneqartariaqarsimavarput, Christian Bork nassuiaavoq.
- Aqaguani iliveqarfimmukaqikkatta issunik ilioraaqqikkaluarpugut, imertaqangaarmalli iluaqutaanngilaq, oqaluttuarpoq.
Ajornartorsiutaavoq
Iliveqarfimmi nutaamik ajornartorsiuteqartoqartoq Kommuneqarfik Sermersuumit nassuerutigineqarpoq.
Kommuneqarfik Sermersuumi Sanarfinermut Avatangiisinullu Ingerlatsivimmi pisortaq ima oqarpoq.
- Ajornartorsiuteqartoqarneranik saaffigineqarpugut aamma iliuuseqartoqapallappoq. Iliveqarfiup imeqarunnaarnissaa sulissutigineqassaaq, qanoq iliuuseqartoqassanersorlu suliniuteqartoqalereerpoq, Hans Henrik Winther Johannsen oqarpoq.
Iliveqarfiup eqqaani eqqagassat
Christian Bork juulimi Paamiuniikkami iliveqarfiup eqqaa aamma kusaginngeqaa, tassami eqqagassarpassuaqarpoq.
- Qatanngutera Facebookikkut allannikuuvoq 'eqqaaveqarfimmut' alakkaaniarluni, tassa iliveqarfimmut alakkaaniarluni. Aamma iliveqarfiup tungaanut aqqusineq pitsaavallaanngilaq, maniinnakuluttorujussuuvormi. Iliveqarfiup eqqaa kusassarneqarnissaa taamaattumik neriuutigaara, Christian Bork oqarpoq.