Ilisimatuut: Meeqqat piitsuunermi peroriartorsinnaasut
Anaanaasup kisimiittup pisortanit ikiorsiissutinik pisartagaqartup akiligassat tamaasa akilereerunigit qaammammut ullormut 25 koruunit inuussutigisassavai. Ikiorsiissutit 4.500 koruunit qaammammut atisanut, nerisassanut akiligasssanullu matussusiissappata, meeqqat kaassinnaanerat aarlerinartuusoq, ilisimatuut naliliipput.
Najarak Svendsen, anaanaavoq kisimiittoq pisortaniillu ikiorsiissutinik pisartagaqarluni. Taassuma ikiorsiissutinik pereerluni akiligassat tamaasa akilereerunigit ullormut 25 koruuninik qaammammut inuussutissaqartalissaaq.
Ikiorsiissutinut inatsit nutaaq naapertorlugu qaammammut 4.500 koruuninik pisartagaqassaaq, tassani ineqarnermut, aningaasartuutinut aalajangersimasunut, nerisassanut atisanullu aningaasartuutit matussuserniartassallugit.
Inatsisip nutaap siunertaraa meeqqat piitsuullutik peroriartunnginnissaat anguniarneqassasoq, piitsuerutsitsisinnaanerali ilisimatuunit qularineqarpoq.
- Atisanut, nerisassanut aningaasartuutinullu aalajangersimasunut akiligassat qaammammut 4.500 koruuninit matussuserneqartassappata, meeqqat ilaat piitsuullutik peroriartunnginnissaat qularnarpoq. Akiligassat tamaasa akilereerpata meeqqap nerilluni naammatsissinnaannginnissaa ajoraluartumik aamma aarlerinarpoq, Ilisimatusarfimmi inuiaqatigiilerinermi ilisimatooq Birger Poppel oqarpoq.
Inuuneq killeqartorujussuaq
Ilisimatusarfimmi sociologi Steven Arnfjord aamma isumaqarpoq inatsit nutaaq meeqqanut ajortumik sunniuteqassasoq, ilaqutariimmi ullormut 25 koruuninik inuussutissaqarunik inuunerminnik killilersuisariaqarsinnaammata.
- Ikiorsiissutinik pisartagaqartut inatsisit nutaaq naapertorlugu aningaasanik ikinnerusunik atuisinnaalissapput. Taamaattumik anaanaasoq inuussutissarsiniutissaqarpianngikkuni meeqqamut sunniuteqassaaq, Steven Arnfjord oqarpoq.
Inuuniarneq killeqalerpat inunnik allanik attaveqarniarneq kiisalu inunnik allanik internetikkut attaveqarniarneq killeqalissaaq.
- Inunnik allanik peqateqarniarnermi akeqarsinnaasartuni, soorlu inuuissiortoqartillugu kaffillernikkut, timersornermi kamippaqarnissamut atisassaqarnissamut pinnguaatinullu akissaqarniarnissaq killeqalersinnaavoq. Tamannalu meeqqani piitsuunermi ersartarpoq. Ilaqutariit aamma angerlarsimaffimminni internetseqarsinnaannginneranut pissutaasinnaavoq, tamannalu atuarfimmit ilinniagassaqartilluni suliarinissaanut killeqarsinnaavoq, Steven Arnfjord, Ilisimatusarfimmi sociologiusoq, oqarpoq.
Ikiorsiissutinut tunngatillugu inatsit nutaaq naapertorlugu illunik piginneqataassuteqartut namminerlu inissiaateqartut ineqarnermut aningaasartuutit matussuserniarlugit annerpaamik 2.500 koruuninik ikiorsiissutinik pisartagaqarsinnaapput.