Skip to main content

Ilisimatuut: Danmark Issittumut tunngatillugu ilungersunartumik kinguussaalerpoq

Naalagaaffiup immami ilisimatusaatitut umiarsuatuaa pisoqaliartupallappoq

Maanna naalakkersuisut siusinnerusukkullu naalakkersuisuusimasut arlaannaalluunniit, “Dana” ingerlallugu akisooq, ukiunik 38-nik pisoqaassusilik ukiualunnilu suli atorneqarsinnaasoq taarserniarlugu aningaasaliissuteqarsimanngillat, Poltikken marlunngornermi taama allaaserisaqarpoq.

Danmark immami sikulippassuakkoorutaasinnaasumik nutaamik umiarsuartaanngikkuni Atlantikup Avannaata imartaani Kalaallillu Nunaata eqqaani ilisimatusarnermut tapersiisinnaanngilaq. Silap pissusaata allanngoriartornerata malitsigisaanik Issittumi isumalluutinut pisinnaatitaaffinnullu tunngatillugit pilernguttoqaleruttornerani danskit ilisimatusarunnaassapput. 

Danmarkip immami ilisimatusarnermut sullissiviata, tassa Dansk Center for Havforksningip, Danmark immami ilisimatusaammik umiarsuaaruttussanngungajalernera ullumi oqallisaarutaasumi aarlerisaarutigaa. 

- Danmarkip sunniuteqarsinnaanera annikilliartuinnavippoq, immamimi ilisimatusaammik umiarsuaqanngikkutta suliassarput pingaarutilik naammassisinnaanngilarput, tassa ilisimatusarsinnaanngilagut minnerunngitsumillu Danmarkip Issittumi ineriartortitsinermik pimoorussinera ersarissarsinnaanngilarput, oqallisaarummi taama allassimasoqarpoq. 

Pilersaarutit piareeqqasut

Nutaamik umiarsualiortitsinissamut pilersaarut, danskit ukiut 100-t sinnerlugit imaani ilisimatusartarnerannik ingerlatitseqqinnissamut nutaaliornissamullu qulakkeerinnissinnaasoq, ukiut arlallit matuma siornali naammassineqareeraluarpoq. Danmarks Tekniske Universiteti nutaaliamik immallu 1 meteri angullugu issussusilikkut sikuatigoorutaasinnaasumik umiarsualiortitsinissamut titartaqqitassioreerpoq. 
Titartaqqitassiaq Ilisimatusarnermut Ministeeriaqarfiup Ilisimatusarnermut Ilinniartitaanermullu Aqutsisoqarfiani oqaloqatigiissutigineqareerpoq, danskilli naalakkersuisuisa aningaasanut inatsisissatut siunnersuutaanni allassimasut naapertorlugit pilersaarutip timitalernissaata aallarnernissaanut umiarsualiortitsinissamullu aningaasanik immikkoortitsisoqarsimanngilaq. Tamannalu isumaalunnarpoq.

- Danmarkip issittumi naalagaaffeqatigiinnikkut siuttuunissi pimooruppagu ilisimatusarnermut tapersiisariaqarlutalu isumalluutit qularnanngitsumik siunissami amerlanerulerumaarsussat eriagisariaqarpavut. Taamaaliunngikkuttami russinut, kiinamiunut allanullu pissaanilissuarnut isumagitissavagut, taakkulu sorraatsumik inatsisaatsuliornermut eqqaanarsinnaasumik ingerlatseriaaseqarataannaapput, Aarhusip Universitetiani lektori DCH-mi siulittaasumut tullersortaasoq Peter Grønkjær Politikkenimut taama oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER