Ilisimatuut: Batteri nutaaq atorlugu oqarasuaatit ulluni tallimani batteriilersorneqartariaarutissaaq

Monash University-mi Australiamiittumi ilisimatuut batteriimik, immiisarnermik allannguerujuttussamik ineriartortitseqqissimapput. Videnskab.dk allappoq.

Ilisimatuut naapertorlugit batteri taanna nutaaq ulluni tallimani oqarasuaammik battereeqartitsisinnaavoq imaluunniit biili innaallagiatortoq 'tank'-imut ataatsimut 1.000 kilometerit ingerlatissinnaavaa (assersuutigineqarsinnaavot Tesla nutaaq ullup affaannaata missaanni ingerlaarsinnaasoq).

Ilisimatuut biilip batteriia Australiamilu innaallagiatigut aqqutilersuutinik atuineq ukioq manna misilerarniarpaat. Batteriit litium-svovlimik sanaajusut, ilisimatuut siunissami atorneqarsinnaanerat isumalluarfigisupilussuuaat.

- Batteriit litium-svovlimik sanaajusut iluatsilluartumik sananeqarsinnaappat aamma biilinut innaallagiatigullu aqqutilersuutinut atassuserneqarsinnaappata, Australiami litiumimik niuerfissuaq 213 milliarder dollarsinik naleqartinneqartoq (Australiamut dollariat danskit koruuniannik 980 milliardinik nalilik) malunnaatilimmik pilersuisunngorsinnaavoq, ilisimatuut batteriimik nassaartut ilaat, Monah Universitymi professori Mainak Majumder universiteti tusagassiorfinnut nalunaaruteqarmat oqaluttuarpoq.

Danskip ilisimatuup batteri atorneqartoq takorusuppaa

Taamatut pikkunarsaalluni nalunaaruteqarnerit soorunami tamatigut pimooruppallaarnagit tiguneqartussaapput, batteriili pineqartoq soqutiginarluinnartutut isikkoqarpoq, Danmarks Tekniske Universitetip (DTU) ataani DTU ENERGY-mi professori Poul Norby oqarpoq.

Poul Norby batteriimik taassuminnga nutaamik ineriartortitseqataasimanngilaq, atuarsimavaali soqutigilerlugulu.

- Soorunami ilanngutassiat taama ittut pikkunarsaagaasarput. Qularinngilara batteriit litium-svovlitallit litium-ionitalinnit pitsaanerunavianngitsut. Ilisimatuulli batteriit pineqartut qanoq pitsaatigineri takutittariaqarpaat, Poul Norby Videnskab.dk-mut oqarpoq.

Ilusilersuinermik nutarterineq pitsaanerujussarnik battereeqartitsilersartoq

Batteriit litium-svovlimik sanaajusut aatsaat nassaarineqanngillat, ajoraluartumilli atuuffigisinnaasaat sivikitsuaraasarpoq.

Ajornartorsiutit ilagisimavaat, svovlkatodetai, batteriip ikumatitsisartua, neruttortarpoq aserorlunilu, taamaaligaangallu batteri sukkasuumik imaaruttarpoq.

Batteriilli litium-svovlinik sanaajusut, Australiami ilisimatuut ineriartortissimasaat siusinnerusumi sanaajusunit patajaannerujussuupput, 200-riarlunilu immeqqinneqarsinnaallutik taamalu pisinnaasaat 99 procentii atuutiinnartarlutik.

Ilisimatuut svovlkatodet batteriit iluini aalasarnissaannut inissaqarnerulersissimavaat, taamaalillutik ajornartorsiutitanngitsumik neruttorlutillu nerukillisinnaanngorlutik.

Tunisassiorneq akikinnerusoq avatangiisinullu mingutsitsinnginnerusoq aamma ileqqorissaarnerusoq

Tusagassiorfinnut nalunaaruteqarnermi ilisimatooq batteriimik ineriartortitseqataasimasoq alla, lektori Matthew Hill oqaluttuarpoq, tunisassiornermi aningaasartuutikinnerunisssamut peqatigitillugu batteriip pisinnaasai pilerinartut, batteriiliornissamut naammattunik atortussaqarneq ajornaannerusumillu tunisassiortarnissaq ulluinnarni assigiinngitsutigut atortakkatsinnut sanilliullugit batteriit pilerigineqarnerulissasut.

Svovl tassunga atatillug akikitsuararsuuvoq, Nunarsuarmimi sumi tamaani annertoorujussuulluni takussaagami.

- Taamatut nutaamik sanariaaseqarnikkut (batteriinik litium-svovlitalinnik sanaartorneq) pisinnaasaqarluarnera sivisuumillu atuussinnaanera kisimik iluaqutigineqarnavianngillat, aammali ajornaatsuunera akikilluinnarneralu iluaqutigineqassaaq, tassa imermik tunngaveqarluni ingerlanneqarnera pissutaalluni. Batteriinik tunisassiornermi eqqakkat avatangiisinut ajoqusiisinnaasut malunnaatilimmik annikillissapput, Matthew Hill oqarpoq.