mianersoqqusineq

Ilisimatuut: Suliffissuarnit kemikaliat meeqqat qarasaannut sunniuteqarput

Misissuinerup nutaap takutippaa stoffit toqunartullit amerlanerujussuit manna tikillugu ilisimasatsinnit annertunerujussuarmik qaratsatsinnik ajoqusiisartut, aviisi ullormut saqqummersartoq Information arfininngormat allappoq

Stoffinik amerlavallaanik, qaratsap ineriartorneranik sunniisunik atugaqartinneqarpugut, aviisi ullormut saqqummersartoq Information arfininngormat allappoq.

Stoffit toqunartullit meeqqat ineriartornerannut attuumassuteqarnerannik immikkut ilisimasallit kemikaliat suliffissuarni atorneqartartut pillugit maanna mianersoqqussuteqarput. Ilisimatuut marluk, Syddansk Universitetimeersup USA-milu Mount Sina Hospital-imeersup meeqqat qarasaasa ineriartornerannik kermikaliat sunniisinnaanerat misissoqqissaarsimavaat, inerniliinerallu ersarippoq: Stoffinik toqunartulinnik amerlavallaanik, qaratsip ineriartorneranik sunniisunik, atugaqartinneqarpugut, aviisi ullormut saqqummersartoq Information arfininngormat allappoq.
Aamma atuaruk: Issittup uumasui kviksølvimik mingutsinneqarput
– Ilaatigut qaratsap ineriartornerani stoffit toqunartullit amerlanerit nassaarisimavagut, ilaatigullu pasivarput stoffit suli amerlanerusut taamatut sunniisinnaasut, Philippe Grandjean oqarpoq. Taanna Syddansk Universitetimi miljømedicin-imi professoriuvoq, misissuinermillu allaaserinnittuulluni, tamassumalu inerneri ullumi atuagassiami tusaamasami The Lancet-imi tamanut saqqummiunneqassapput.
Meeqqat autismemik, ADHD-mik ineriartornermilu allanik akornutillit amerliartorput, pissutaasullu pingaarutillit tassaapput stoffit toqunartullit, ilumiuullutali qaratsatsinnut sunniuteqartartut, misissuinerup nutaap tamanna takutippaa. "Kemikaliat toqunartullit naammattumik nakkutiginngilavut meerartavut ilersorniarlugit - pingaartumik qarasaq ineriartornermini stoffinik toqunartunik sunnertiasuararsuuvoq", Philippe Grandjean oqarpoq.
Stoffit ajoqusiisinnaanerpaat tassaapput ilisimaneqareersut tassaapput aqerloq kviksølvilu, aammattaarli tassaapput arrorsaatit toqunartullu tissalukaarutit, tamakkualu atisatsinniipput, pequtiniillutik nerisassaniillutillu. Ukiut kingulliit arfineq-marluk ingerlaneranni kemikaliat, uppernarsillugu meeqqat qarasaata ineriartorneranik sunniisartut, marloriaatinngorsimapput arfinilinniit 12-inut. Tamanna peqatigalugu stoffit nutaat 12-it atugaalersimapput inersimasuni sianiutinik ajoqusiisinnaasut. TDamatuma kingunerissavaa kinguaariit tulliuttut paasinninnermut qisuariarnermullu kigaannerulissapput, atuarfimmi ingerlanerliornerussallutik aammalu qarasartik tamakkiisumik atorsinnaassanagu, Philippe Grandjean nassuiaavoq:
– Maannangaaq takusinnaalereerparput aqerloq, kviksølvi stoffillu qulit missaanniittut allat meeqqat qarasaannik ´nipaatsumik´ nappaalatitsillutik ajoqusiisut, taamaattumik nutaanik malittarisassaqalernissaq pisariaqarpoq, taanna oqarpoq siunnersuutigalugulu nunani tamalaani periusiliortoqassasoq, tassuuna qulakkeerlugu kemikaliat suliffissuit atugaasa meeqqat ineriartornerannik ajoqusiissanngitsut. Ilisimatuut taakkua marluk maannakkut mianersoqqussuteqarnerat nalaatsornerinnaanngilaq, tassa maanna siullermeersumik kemikaliat qaratsap ineriartorneranut ajoqusiisinnaanerisa uuttortarnissaanut periutsinik nassaartoqarmat, "tdaamaattumik nunani tamalaani malittarisassiornissamut piareersimavugut kinguaariit tulliuttut silassorissusissaat illersorniarlugu", Philippe Grandjean tikkuaavoq.

Powered by Labrador CMS