Ilisimatuut spiralilersuisimanermik suliamik qulaajaanermik suliaqartut aallartittut
Ilisimatuut qulaajaanermik suliaqartut kalluarneqarsimasunut kaammattuipput qanoq misigisaqarsimanerminnik maannangaaq oqaluttualereeqqullugu septembarimilu innuttaasunik ataatsimiititsinissamik pilersaaruteqarlutik.
Ilisimatuut spiralilersuisimanermik kanngunartuliamik qulaajaanermik suliaqartut innuttaasunit Danmarkimi Nuummilu septembarimi naapinneqarsinnaassapput. Taama ilisimatuut tusagassiuutitigut nalunaarummi paasissutissiipput.
Nakorsaaneqarfiup arnat tamaasa kaammattoreersimavai misigisaminnik oqaluttuarinneqqullugit ilisimatuullu erseqqissaapput, misigisanik oqaluttuanik tunniussinissamut suli tikilluaqqusaasoqartoq.
Misigisimasanik oqaluttuat ilisimatuunut toqqaannartumik imaluunniit innuttaasunik ataatsimiititsinerni tunniunneqarsinnaanngillat, akerlianilli peqqinnissaqarfimmut naammagittaalliuutitut Sullissivik.gl aqqutigalugu imaluunniit Nunatta Nakorsaaneqarfia toqqaannartumik attaveqarfigalugu tunniunneqarsinnaallutik.
Ukiaru innuttaasunik ataatsimiititsisoqassaaq
Ilisimatuut Nuummi septembarip 7-ani Odensemilu septembarip 27-ani innuttaasunik ataatsimiititsinernut aggersaagunik ilimatuut spiralilersuisimanermik kanngunartuliamik arlaannaannulluunniit attuumassuteqanngitsumik qulaajaalluni suliaqarnermik Kalaallit Nunaannilu Danmarkimilu efterskoleni atuartunik 1960-imit 1991-imut naartunaveersaasersueriaatsimik ingerlanneqarsimasumik saqqummiussissapput. Ataatsimiinnerit internettikkut malinnaavigineqarsinnaassapput.
Ilisimatuut Ilisimatusarfimmi Issittumi Atugarissaarnermik Ilisimatusarfimmit aamma Statens Institutimi Innuttaasut Peqqissusiannik Ilisimatusarfimmit kiisalu Københavns Universitetimi Rigsarkivimillu pisut qulaajaanermik suliarinnittuupput.
Arlaannaannulluunniit attuumassuteqanngitsumik qulaajaaneq ukiuni marlunni ingerlanneqassaaq makku qulaajarneqassallutik:
1960-ikkunni aallartittumik naartunaveersaartitsinermut tunngasunik suliaqarnerup aallartinnerani tunngaviit.
Aalajangiinerup ingerlarnga, spiralinik allanillu naartunaveersaatinik atuilernermut tunngasunik suliaqalernermut aqqutaasut.
Kalaallit Nunaanni aamma Danmarkimi efterskolini allatsissimasunut kalaallinut niviarsiaqqanut suliniutip ingerlanneqarnera.
Kalaallit niviarsiaqqat arnallu tamatuma ingerlanerani qanoq misiginerat nassuiaanernit katersaneersut.
Piffissami tamatumani Kalaallit Nunaanni Danmarkimilu Kalaallit Nunaanniit efterskolertut naartunaveersaartitsinissamik periuserisimasat spiralilersuisimanerillu inatsisitigut, allaffissornikkut aamma peqqinnissakkut ilisimasat tunngaviusimasut.
Qulaajaanermi piffissaq 1960-1991-imut peqqinnissaqarfiup nunatsinnit tiguneqarnissaata tungaanut pineqassaaq. Qulaajaanerup maajimi 2025-mi naammassineqarnissaa naatsorsuutigineqarpoq.