Ilisimatuut sermersuup ataani ilisimaneqanngitsumik misissuiniartut
Nunarsuup ukiut 100.000-it aamma 400.000-it matuma siornatigut kiannerani, sermersuaq annertuumik aammat, nunarsuarmi imaq qanoq qaffatsigisimaava? Tamanna Amerikami ilisimatuut Kalaallit Nunaata avannaani misissuinermikkut paasiniarniarpaat.
Amerikami universitetit arlallit peqatigiillutik misissuiniarput, tassan ilisimatuut Avannaanni sermersuaq qilleriffigalugu misissugassanik tigusissallutik.
Suliniut GreenDrill-imik taaguuserneqarsimavoq, suliniuteqarnermilu sermersuup misissuiffigineqarnissaa pineqarpallaanngilaq. Ilisimatuulli sermersuaq akimorlugu qilleriniarput, sermip ataani qaarsoq ilanngullugu:
- Siunertaavoq Kalaallit Nunaata avannaani sumiiffinni arlalinni qaarsumit misissugassanik tigusinissaq. Qaarsut taakku toqqorsivittut atuupput, paasissutissanillu kemiskiusunik akoqarlutik, paasissutissat taakku takutissinnaavaat, sumiiffiit pineqartut qanga kingullmermik sermeqarsimannginnersut, University at Buffalo, New York, nittartakkamini allappoq.
Ilisimatuut qaarsumik misissuinermikkut paasiniarniarpaat, nunarsuup ukiut 100.000-it aamma 400.000-it matuma siornatigut kiannerani, Kalaallit Nunaata avannaani sermeq aassimanersoq.
Syv millioner dollarsinik aningaasaliiffigineqarsimasoq
Ilisimatuunit naatsorsuutigineqarpoq, misissuinermi ilisimalikkat ukiuni hunnorujukkuutaani maanna atuuttuni Sermersuup aakkiartornerani, nunarsuarmi immapq qanoq qaffatsigisinnaaneranik siulittasuisarneq pitsaanerulersissagaat.
GreenDrill syv millioner dollarsinik – 44 millioner koruunit sinnilaarlugit nalilinnik - aningaasaliiffigineqarsimavoq, ilisimatuullu naatsorsuutigaat piareersaanerit pilersaarutit malillugit ingerlassappata, 2021-mi aasakkut Kalaallit Nunaannut tikinnissartik, tassani sumerpiaq qillerisoqassanersoq aalajangiisoqassalluni.
Qillerinerit 2022-mi aallartinneqassasut naatsorsuutigineqarpoq.