ajunaarnersuaq
Ilisimatuut: Malissui 90 meterisut portutigisimapput
Karrat Kangerluani nunap sisoornera malissuarnik pilersitsivoq, iluliamernit imarlu 90 meterisut portutigisumut pitillugit
Paasissutissat taakku ilisimatuunit Georgia Techimi USA-meersunit pissarsiaapput, taakku qaqqap ilaata sisoorfigisaanut malissuaqartitsisumut angalanerminnit angerlaqqammerput.
Qaqqap ilaata nakkaaffigisaata nalaani imaq 90 meterisut portussuseqalersimasoq ilisimatuut paasivaat, Karrat Kangerluannilu toqqaannartumik akimut 50 meteriusimalluni. Taakku tamarmik Japanimi 2011-imi tassaarsuaqarneranik qaangiipput, taanna 40 meterisut portutigisimavoq.
Aamma atuaruk: Tassaarsuarmit eqqugaasut umiatsianik piniutinillu nutaanik pisaassapput
Sukkasuumik siaruartertut
Malissuit siullermik portusoorsuusimanerinik kangerlummilu sukkasuumik siaruaassimanerinik paasinarsititsisoq, professor Hermann Fritz Georgia Techimeersoq oqarpoq.
Paasissutissat pingaarutillit aannginnerini ilisimatuut katersorniarsimagaat taanna oqaluttuarpoq. Tassami ilulissat tassaarsuarmit nunamut qaqinneqarsimasut sukkasuumik aakkiartulereermata.
Sooq inuit sisamat imaanut amutissimanersut, Nuugaatsiamilu innuttaasut allat ulorianartorsiornerit anigorsinnaasimaneraat, ilisimatuut aamma paaserusussimavaat.
Qisuariarnissamut piffissaqarpianngitsoq
- Taama ititigisumi malissuit arsaattarfittut takissusilimmik sekundimut ingerlaartarput, taamaammat malissuit sukkasuumik takkupput - qularnanngitsumik minutsit tallimat ingerlanerani nunaqarfimmut 30 kilometerisut ungasissusilimmut pipput. Qisuariarnissamut periarfissaqarpallaanngilaq, Hermann Fritz tusagassiuutinut nalunaarummi oqarpoq.
- Qaqqap sisoorneranit nunap sajulaarnera, nipaa aamma ilulissat nalinginnaanngitsumik aalanerisa nammineq qimarrannermik kinguneqartitsivoq, taanna oqarpoq.
Aamma atuaruk: Qaqqap allap ilaa sisoorsinnaasoq
Juulip aallartinnerani Hermann Fritzip vulcanolog Thomas Giachetti University of Oregonimeersoq aamma geoteknisk ingeniøri Scott Anderson BGC Engineeringimeersoq peqatigalugit ajunaarnersuaq pillugu paasissutissanik katersuiniarlutik National Science Foundationimit taperserneqarlutik aallarput, taamaaleriarlutik qaqqap sisoorneranik 3-D-mik pisumik takusassiorniarput.
Alaskami nunap sisoorneranut eqqaanartoq
Qaqqap sisoornera Lituya Bayimi Alaskami 1958-imi tassaarsuartitsisumut misissorsimasaminut eqqaanartoq, professori oqarpoq. Kangerluk amitsoq aamma ikkatsoq oqaluttuarisaanermi nalunaarsorneqarsimasumi malissuarmik annerpaamik pilersitsivoq.
Karrat Kangerluanni Uummannap eqqaaniittumi qaqqaq sisoortoq immami itinerusumut nakkarpoq, kangerlullu anginerujussuuvoq. Qaqqap sisoornera minnerpaamik Lituya Bayimi nunap sisoorneratut annertussuseqassasoq - immaqalu annertunerusimassasoq - Hermann Fritzip naatsorsuutigaa.