Ilisimatuut Issittumi kallernerusoqartalernera ernummatigigaat
Issittumi siorna kallertoqartarsimanera ukiut qulingiluat kingulliit ingerlanerannut sanilliullugu marloriaatigajaapput. Kallertoqarnerusalernerata takutippaa, silap pissusaatigut ajornartorsiuteqartoqalersimasoq, silasiortut ilisimatuullu oqaatigaat.
Siorna Issittumi 7.278-eriarluni kallersimavoq.
Ukiuni qulingiluani kingullerni kallertoqartarsimanerata marloriaatingajaanik kallertoqarsimavoq, Tuluit Nunaanni aviisi The Guardian.
Finlandimi Vaisala-mi silasiortut ilisimatuullu tamanna ernummatigaat.
Nakkutigineqassasoq
- Nunarsuup avannarpasinnerusortaani–80 gradit avannaata tungaani –kallernerusoqangaatsiartalersimavoq. Taamatut malunnartigisumik allanngortoqarnera qularnanngitsumik tupaallaatigineqartussaavoq, Vaisala-mi silasiornermi kallertoqartarnissaanillu siulittuisarnermi pisortaq Chris Vagasky tuluit aviisiannut oqarpoq.
Taassuma taamaammat kaammattuutigaa, Issittumi kallertoqartarnera nakkutigineqarnerulissasoq.
- Tamanna immikkut pingaaruteqarpoq, aamma maanna siunissamilu misissuiffigineqartariaqarpoq, taanna oqarpoq.