Ilisimatuussutsikkut suliniut annertooq kalaallit illuinik ukkatarinnippoq

DTU Byg 12,2 millionit koruuninik aningaasanik atugassaqarluni kalaallit illunik sanaartortarnerat misissuiffigalugu maanna aallartippoq, illut sorliit issittumut tulluarnerunersut paasineqarniassammata.

Pissutsini ilungersunartuni sanaartornermut pitsaanerulissagaanni, Issittumi sanaartornermi ilisimasat annertunerusut pisariaqartinneqarput.

Suliniut ukiunik sisamanik sivisussuseqartoq
DTU Bygip maanna Nunatsinni illut toqqakkat aalajangersimasut ukiuni sisamani ilisimatuussutsikkut suliniuteqarnermi misissorlugit nalilersorlugillu aallartinneranut tamanna tunuliaqutaavoq.

Ilisimatuussutsikkut suliniutip issittumi silaannaap aamma kalaallit sanaartortariaasiata ataqatigiinnerat pitsaanerusumik paasinarsassavaa.

- Inernissat uuttorsinnaavagut, kisianni inuit illut najugaqarfigalugit qanoq igineraat apeqqut pingaaruteqarpoq. Issittumi sanaartorneq siammasissumik silap pissusianik ilungersunartumit qanoq sunniuteqarfigineqartarnersoq paasisaqarfiginerorusupparput. Silap pissusianut tunngavoq, kisianni aamma kulturimut – qeqertanik ingerlatsinermik taasakkatsinnik – inuiaqatigiit ikitsut qeqertatut pisaramik. Ilaatigut angallannikkut pissutsit ilungersunartut, kisianni allarpassuarnik aamma imaqarpoq, Tove Lading, DTU Bygimi lektori, suliniummi pisortaasoq oqarpoq.

Kalaallit Nunaanni issittumi sanaartornermi atukkat pillugit ilisimasat annertusut, Tove Lading nassuiaavoq. Ilisimasat taakku inunni ataasiakkaaniikkajunnerat taamaallaat ajornartorsiutaavoq, tulleriiaakkamillu katersorneqarani uppernarsarneqarnikuunani.

- Ilisimatuussutsikkut suliniutip tamanna tulleriaaraluni inissianik nalinginnaasunik misissuinikkut qulaajassavaa, Tove Lading ilisimatitsivoq.

Issittumisuliniuteqarneq
DTU-mi forskningsdekanip, Katrine Krogh Andersenip, suliniut DTU-p issittumi suliniuteqarneranut ilaaginnartutut isigaa.

- Issittumi ilisimatusarneq ukiuni aggersuni annertuumik pingaaruteqalissaaq, minnerunngitsumik piujuartitsinermut aamma Issittumi pisuussuterpassuit atorluarnissaannut periarfissat ataqatigiinnerat pissutigalugu. Avatangiiseq imaannaanngitsunik unammilligassartaqarpoq, taamaattumillu pissutsit tamakkiisumik paasinissaat tulluarsarnissaallu pingaaruteqarpoq, Katrine Krogh Andersen oqarpoq.

Powered by Labrador CMS