Ilisimatuup Trumpip neqeroorsimanera misissoqqissaarniarpaa
Danmarkip Kalaallit Nunaatalu aallartitaqarnikkut attaveqarnerat ilisimatuussutsikkut suliniummi nutaami misissorneqassapput. Trumpip pisiniarnerminik neqerooruteqarnerani tusaamaneqartumi nunani aallartitat qanoq qisuariarsimanersut, ilisimatuup ilaatigut misissorniarpai.
Kunngeqarfimmi Kalaallit Nunaat peqataatinnagu Danmark nunani tamalaani annikinnerujussuarmik sunniuteqassagaluarpoq, danskit politikeriisa tamanna maluginialeraluttuinnarpaat, ilisimatooq Marc Jacobsen taama naliliivoq.
Taanna Københavns Universitetimit inuiaqatigiilerinermi pissaanermik atuinermik agguataarinninneq pillugit ph.d.-uvoq, tassani Issittumi nunat tamalaat politikkiannik allaaserisaqarpoq, ukiunilu marlunni kingullerni University of Cambridgemut attuumassuteqarpoq.
Suliniummi nutaami Marc Jacobsenip Kalaallit Nunaata Danmarkillu akornanni aallartitaqarnikkut attaveqarnera misissorniarpa, nunanit tamalaanit Issittup malugineqarneruleriartornerani attaveqarnerat qanoq ineriartorsimanersoq takuniarlugu.
Danmarkip Kalaallit Nunaat pissutigalugu Issittumi naalagaaffittut oqaatigineqarsinnaanera, ilisimatuup tikkuarpaa, tamatumalu Danmark nunanut tamalaanut tunngatillugu pingaaruteqarnerulersippaa. Illuani Kalaallit Nunaata maluginiarneqarneq nunami namminermi pissaanerup nikisinneqarnissaanut immaqa atorsinnaavaa, taanna naliliivoq:
- Kalaallit Nunaat oqartussaanerorusuppoq
- Kunngeqarfiup issittumut periusissiaa nutaaq, siorna naammassisussaagaluartoq assersuutissatsialaavoq. Kalaallit Nunaanni coronaqarlunilu qinersisoqarnikuugaluarpoq – kisianni aamma periusissiaq isumaqatigiinngissutigineqarmat kinguaattoortoqarpoq.
- Kalaallit Nunaat oqartussaanerorusuppoq. Tamanna juunimi pilersinneqarpoq, tassani Kalaallit Nunaanni, Danmarkimi Savalimmiunilu naalakkersuisuni siulittaasut isumaqatigiissutigaat, Kalaallit Nunaat Issittumi Siunnersuisoqatigiinnut atatillugu atsiortuusarlunilu oqaaseqaqqaartassasoq. Tamanna immaqa takussutissaannaavoq, kisianni Issittup nunani tamalaanit soqutigineqaleriartuinnarnerani pissaanerup nikisinneqalaarnissaa anguniarneqarpoq, Marc Jacobsen oqarpoq.
Marc Jacobsen suliniummut Carlsbergfondetimit 1,4 millionit koruuninik pissarsivoq. Ilisimatuussutsikkut misissuineq Dansk Institut for Internationale Studierimi (DIIS) ukiuni marlunni tulliuttuni pissaaq.
USA-mi præsidentiusimasup Donald Trumpip 2019-imi USA-p Kalaallit Nunaata pisiarissagaa siunnersuutigimmagu, Kalaallit Nunaanni Danmarkimilu qisuariaatit ilisimatuup ilaatigut misissorniarpai.
Trumpip neqeroorutaanut qisuariarnerit misissorneqartut
- Nuummi Københavnimilu aallartitat qanoq suleqatigiissimanersut allagaatinik takunnikkumaffigissavakka, Marc Jacobsen oqaluttuarpoq.
Taamatut pisoqarnera nunarsuarmi tusagassiorfiit Kalaallit Nunaannut sivikitsumik maluginninniarnerannik kinguneqarpoq. Trumpip pisinissamik neqeroorutaa itigartinneqarpoq, kisianni neqeroorut Amerikamiut ajunngisaarnikkut qanilliniarneranut ilaasoq, Marc Jacobsenip eqqaasitsissutigaa:
- Pisinissamik neqeroorut Amerikamiut ukkatarinninnerisa annertuup ilagiinnarpaa. Naak taanna piviusorsiunngikkaluartoq, USA-p Kalaallit Nunaanni sakkutooqarnini annertusarusukkaa maanna nalunngilarput, tassani ilaatigut nuna sakkutuut umiarsuaqarfissarisinnaasaannik ujartuivoq. USA aamma aatsitassanut qaqutigoortunut ikiorsiissutinik taasanik assigiinngitsunik akuersissuteqarnikuuvoq, Marc Jacobsen oqarpoq.
2025-mi atuakkianngussasoq
Danmarkip, Kalaallit Nunaata Savalimmiullu Issittumi Siunnersuisoqatigiinni siulittaasuuffeqalerpata, ilisimatuussutsikkut suliniut 2025-imi atuakkamik saqqummersitsinermik inerneqassaaq.
- Politikerit atorfilittallu nunanit tamalaanit maluginiarneqarnerup nutaap nalaani qanoq qisuariartarnissamut tapertaasinnaanissaa neriuutigaara. Tamatuma saniatigut Kalaallit Nunaanni, Danmarkimi Savalimmiunilu innuttaasut, Issittup nunanut tamalaanut qanoq pingaaruteqartigineranik ilisimasaqarnerulersitsinissaa neriuutigaara, Marc Jacobsen oqarpoq.