Ilisimatusartut qaffasissumik unamminissaannut Nuummiut piareerput
Ilisimatusartut tallimat nunatsinni ilisimatusaatiminnik saqqummiillaqqinneqqusaatilerpata, pingasunngornermi Paasisavut aaqqissuunneqarnerani Katuaq ulikkaarniarpasippoq. Ataasinngornermi billetinit 400-nit 347-t inniminnerneqareerput.
Ilisimatusartut tallimat innuttaasunut paasinartumik ilisimatusaamminnik saqqummiillaqqinneqqusaannissamut toqqarneqartut ulluni arlalinni sungiusarsimapput, Katuamilu Nuummi pingasunngornermi unamminissaminnut piareersarlutik.
Aaqqissuussamut soqutiginninneq annertorpasippoq. Aaqqissuisut Arctic Hub-imeersut tusagassiuutinut nalunaarummi ilisimatitsipput.
- Paasisavut tassaavoq Kalaallit Nunaanni ilisimatusarnerpassuit ingerlanneqartut ilaannik, innuttaasunut tamanut periuseq allarluinnaq atorlugu saqqummiussineq. Aallakaatitsineq suliluunnit ingerlanneqanngitsoq, Paasisavut pillugu taamak annertutigisumik soqutigineqarnera soorunami annertuumik tulluusimaarutigaarput, Arctic Hubip allattoqarfiani pisortaq, Anna-Sofie Skjervedal, Paasisavummi aaqqissuisoq oqarpoq.
Aallakaatitsineq ullunik marlunnik sioqqutiinnartoq billetsit 400 akornanni 347 inniminneerneqareersimapput.
Inuunerissuunissamit isigiarsunnermut
Pingasunngorpat nalunaaqutaq 19.30 Kalaallit Nunaanni PhD-ertunik siullerpaamik unammisitsineq ingerlanneqassaaq
Saqqummiussillaaqqinneqqusaannermut annguttut tallimat ilisimatusaatinit assigiinngeqisunit aallaaveqarput.
Siulliup nunatsinni qeriuaannartup masarsuani silaannaq kvælstofi misissorsimavaa, tulliata umiarsuarnik takornariartaatinik takornariartitsisarnerup qanoq ililluni piujuaannartunngortinneqarsinnaanissaa misissorsimavaa, pingajuata kalaallit meerartaasa akornanni isigiarsuttuunerup qanoq pinaveersaartinneqarsinnaanera misissorsimavaa, sisamaata Tasiilap illoqarfianik ineriartortitsineq sammisaraa kiisalu tallimaata kalaallit akornanni inuunerissuseq sunaanersoq misissugaraa.
Aalajangiisussat sunniuteqarluartuusut
Ataatsimoorlutik tamarmik allanut naleqqiullugu ilisimatusarnerminnik saqqummiussillaqqinnertik pikkoriffigaat.
Ilisimatusarfigisaminnik saqqummeereerunik ilisimatuut ilisimaneqarluartut aalajangissavaat kina saqqummiusillaqqinnerpaanersoq. Aalajangiisussat tassaapput ujarassiooq Minik Rosing, oqaluttuarisaanermik ilisimatusartoq Bo Lidegaard, Arctic Hubip allattoqarfiani pisortaq Anna-Sofie Skjervedal kiisalu Ilisimatusarfimmi rektori Gitte Adler-Reimer. Aallakaatitsinermi aaqqissuisuuvoq Maria Motzfeldt.
Paasisavut Arctic Hubimit Ilisimatusarfimmillu aaqqissorneqarpoq.