Ilisimatusartut peqataatitsinerunissaat ICC-p kaammattuutigaa
Inuit Circumpolar Council, ICC. issittumi ilisimatusartut nunap inoqqaavinik peqataatitsinerunissaannut iliuusissanik arfineq-pingasunik innersuussaqarpoq. Ilisimatusartut tusarnaarnerusariaqarput tatigeqatigiinnermillu pilersitsiniartariaqarlutik, ICC isumaqarpoq.
Ilisimatusarnerit arlallit nunatsinni ingerlanneqarput, amerlanerpaartaalli nunatsinni innuttaasunit malugineqanngitsoortarput, paasisallu aamma pineqartunut ingerlateqqinneqanngitsoortarlutik.
Suliniutit ilaat iluaqutaallutik sumiiffiit ilaanni ilisimatusarnermi paasisat innuttaasunit pissarsiariuminarnerulersimapput. Soorlu ilisimatusartut illuannik Narsami pilersitsisoqarnermi, ilisimatusarnermi inernerusut tamarluinnaasa katersorneqartalerput innuttaasuniillu aamma atuarneqarsinnaalerlutik.
Ilisimatusartulli Issittumi nunani ilisimatusarnerminni inunnik peqataatitsinerunissaannut iliuusissanik arfineq-pingasunik Inuit Circumpolar Council, ICC, maanna innersuussuteqarpoq. Innersuussutit Issittumut tamarmut atuupput, soorlu aamma nunatsinnut atuuttut.
Peqataatitsineruneq
Arctic Hub nunatsinni ilisimatusartut innuttaasullu qanimut attaveqatigiinnerunissaanik ilaatigut suliaqartoq, nittartakkamini, arctichub.gl-imi innersuussutit arfineq-pingasut allaaserisai.
Innersuussutit arfineq-pingasut tassaapput:
- Pineqartilluta avaqqunneqassanngilagut – Inuit peqataatittuakkit
- Nunap inoqqaavisa ilisimasaat namminerisamik ilusiatut akuersaaruk
- Pitsaasumik naalakkersuineq ingerlaguk
- Siunertaqartumik attaveqarit
- Naatsorsuutigineqarsinnaagit – Tatiginninnerup inerisarnera
- Suleqatigiinneq isumatusaartoq pilersiguk
- Paasissutissat ilisimalikkallu katersorneqarnerani avitseqatigiinneq, piginniittuuneq aammalu akuersissuteqarneq
- Naligiinnerup Inuit peqataanissaat ilisimasaallu aningaasalersorligit
ICC-p nalunaarusiaa innersuussutillu arfineq-pingasut, ICC-p nittartagaani atuarsinnaavatit.