Ilisimatusartut Kalaallit Nunaanni suliartik pillugu nersornaaserneqartut
Silap pissusiata allanngoriartornerata Kalaallit Nunaanni kulturikkut kingornussat aseroriartornerannut sunniutaanik qulaajaaneq ilisimatusartut ilaatigut Nunatta Katersugaasivianeersut nersornaammik ataqqinartumik pissarsissutigaat.
Ilisimatusaatitut suliniummit Remains of Greenlandimit Kalaallit Nunaanni kulturikkut kingornussat silap pissusiata allanngoriartorneranit qanoq sunnerneqarsimanerat misissorneqarsimavoq.
Ilisimatusartut paasisaat European Association of Archaeologistsimit (EAA) nersornaammik ataqqinartumik European Heritage Prizemik nersornaaserneqarnermik kinguneqarput.
Taama Danmarkimi katersugaavissuaq det danske Nationalmuseum paasissutissiivoq.
- Remains of Greenland aqqutigalugu Danmarkimi Kalaallit Nunaannilu katersugaasivissuit silap pissusiata allanngoriartornerata kulturikkut kingornussarsianut itsarnitsunut sunniutaasa paasinissaannut pingaarutilimmik tamatigoortumillu tunniussaqaqataasimapput. REMAINS silap pissusiata allanngoriartorneri taakkua nunamut itsarnisaqarfimmut sunniutai pillugit ullutsinni oqaloqatigiinnermut pingaaruteqassutsimik ersarissumik neqerooruteqarpoq, EAA-p nersornaasineq pillugu tunngavilersuutaani oqaatigineqarpoq.
Sumiiffiit itsarnitsanut tunngasut 6.000-it
Suliniummit Remains of Greenlandimit silap pissusiata allanngoriartornerata nunap neriorneqarneranik qeriuaannartullu aakkiartorneranik qanoq kinguneqartarnera misissorneqarsimavoq.
Ineriartornerup tamatuma Kalaallit Nunaata nunataani atortut kulturikkut oqaluttuarisaanermut attuumassutillit aseroriartuaarnerannik annertunerulersitsivoq:
- Tamatumanilu ilaatigut pineqarput sumiiffiit itsarnitsanut tunngasut nalunaarsorneqarsimasut 6.000-it sinneqartut, inuit qanoq inuusimanerannik paasisaqarnerusitsisinnaasut, Nationalmuseet allappoq.
Komité arlaannaannulluunniit attuumassuteqanngitsoq itsarnisarsiornerup Europami itsarnitsanik kingornussarsiat itsarnisarsiornermit siuarsarneqarnerannik tammatsaaliorneeqarnerannillu aamma illersorneqarnerannik ilisaritinneqarnerannillu ilisimasanik siammarsaanermut maluginiarnartumut nersornaammik European Heritage Prizemik ukiut tamaasa tunniussisarpoq, Nationalmuseet paasissutissiivoq.
Aatsaavissuaq Danmarkimi Kalaallit Nunaannilu kulturimut tunngasumik suliaqarfimmik nersornaammik taassuminnga nersornaasiisoqarpoq.