Ilisimatusartoq: Tunumiut Kalaallit Nunaanni ajattugaallutillu naqisimaneqartarput
Tunumiut nunasiaatilittut naqisimanninnermut assingusumik pineqartarput, Danmarkip taamatut pinera amerlasuunit isornartorsiorneqartarpoq, ph.d.-nngorniartoq Ulunnguaq Markussen nunap immikkoortuani misissuinermi kingorna taama isummerpoq.
Tunumi innuttaasut Nunatta Kitaanit allaanerusumik kultureqarlutik isumaqarput, Tunumiullu politikkimut tunngassutilinnik tusaaneqartarnatik misigisimapput.
Tunumiut oqaasii aamma allaanerujussuupput, Tunumiullu aamma pimmiatigineqarneq, immikkoortinneqarneq aamma nunap immikkoortuanut allamut nuukkaangamik suminngaanneerneq pillugu kalaallinit allanit ajattorneqarneq misigisarpaat.
Ulunnguaq Markussen Ilisimatusarfimmi ph.d.-nngorniarluni suliniuteqarnerminut misissuinermi kingorna Forskerforum.dk-mut taama oqarpoq.
Ilisimatusartup oqarnera naapertorlugu, nunasiaatilittut Danmarkip isornartorsiorneqaatigisaatut ittumik Tunumiut pineqartarput:
- Ilikkagaqarsimannginnerput tupigusuutigaara
- Naqisimanninneq aamma ajattugaaneq qaangerniarlugu ukiorpassuarni ilungersuutigisimasarput, maanna Tunumiunut misigitipparput. Nammineq oqaluttuarisaanitsinnit ilikkagaqarsimannginnerput tupigusuutigaara, Ulunnguaq Markussen Tunumi misissuinini tunuliaqutigalugit Forskerforum.dk-mut taama oqarpoq.
Ilisimatusartoq pd.d.-nngorniutigalugu suliniummik aallaqqaammut inuiaqatigiit amerlanngitsut nunarsuarmiunngorsaanermut akiuussinnaassuseqarnerannut tunngasumik ingerlataqarpoq. Kisianni Tunumi misissuinermi inerneri pissutigalugit suliniummini ukkatarisaa allanngorpoq.
Sapilernermik aamma ajattugaanermik misigissuseq Tunumi ineriartornissamut aporfiusoq, taanna naliliivoq.
