Ilisimatusartoq: Periusissiaq anguniakkanik ersarissunik imaqartariaqarpoq
Nunatsinni angerlarsimaffeqanngitsuuneq pillugu ilisimatusartoq isumaqarpoq Naalakkersuisut angerlarsimaffeqanngitsuuneq pillugu periusissiaanni iluatsinnissaanut anguniakkanik ersarissunik imaqartariaqartoq.
Nunarput angerlarsimaffeqanngitsuuneq pillugu suliniuteqarluartussamik periusissiaqalernera nutaarsiassatsialaavoq. Ilisimatusarfimmi inuiaqatigiilerinermi, aningaasaqarnermi tusagassiutilerinermilu institutimi lektori, Steven Arnfjord, angerlarsimaffeqanngitsuuneq pillugu ukiuni arlalinni ilisimatusarsimasoq taama isumaqarpoq. Periusissialli iluatsilluartutut nalilernissaanut anguniakkat ersarissut aamma pigineqartariaqartut, taanna isumaqarpoq.
- Periusissiaq iluatsinnersoq takusinnaavarput angerlarsimaffeqanngitsut kisinneqarnerani tulliani ikileriaateqarsimappata. Aammali periusissiami sunarpiaq anguniarneqarnersoq ilaasariaqarpoq. Soorlu inuusuttunuku siulliullugit angerlarsimaffeqalersinniarneqartut, imaluunniit suminngaanniit aallartittoqassava, Steven Arnfjord Sermitsiaq.AG-mut oqarpoq.
2022-mi angerlarsimaffeqanngitsut 491-it
Nunatsinni angerlarsimaffeqanngitsunik pisortatigoortumik siullerpaamik 2022-mi kisitsisoqarmat, nunatsinni angerlarsimaffeqanngitsut 491-iupput. Amerlanerit Nuummiillutik.
Angerlarsimaffeqanngitsut ikilisinneqassasut Naalakkersuisut oqartareerput. Periusissiarli atorlugu angerlarsimaffeqanngitsut qanoq ikilitigippata periusissiaq iluatsilluartutut taaneqarsinnaalissanersoq, isumaginninnermut naalakkersuisoq Jess Svane, S, Sermitsiaq.AG-mit aperineqarpoq.
- Taamatut oqaatigiuminaappoq, periusissiaq suliarput nunatsinni siullersaavoq. Taama ittumik siornatigut peqarnikuunngilagut. Innuttaasut taama inissisimasut inuiaqatigiinnut akuliuteqqinnissaannut sulinissaq oqittuinnaassanngilaq.
- Upperilluinnarpara periusissiaq angerlarsimaffeqanngitsuunermik ajornartorsiuteqartunut iluaqutaassasoq, suleqatigiittoqarnissarli pingaaruteqarpoq, Jess Svane Sermitsiaq.AG-mut oqarpoq.
Kommunit aamma suliaqartariaqarput
Innuttaasut ilungersunartumik inissisimasut ikiorniarlugit kommunit annertunerpaamik suliaqartussaapput. Steven Arnfjord isumaqarpoq kommunit najukkaminni politikkikkut periusissianik suliaqartariaqartut, innuttaasut namminneerlutik ineqarsinnaanissaat pillugu.
- Maanna taamaaliorsinnaapput. Qangali periusissialiorsimasinnaagaluarput. Maannakkulli suuteqannginnermiit, nuna tamakkerlugu periusissiaqalerpugut. Suliniutit periusissiallu pillugit kommunit aamma oqaloqatigiinnissaat pingaaruteqarpoq, oqarpoq.
Naalakkersuisut angerlarsimaffeqanngitsuuneq pillugu periusissiaat suliniutinik 13-inik imaqartoq, 2025 ilanngullugu atuutissaaq.
- Piffissaliussaq imminermini ajunngilaq. Periusissiaq tulluarteqqaalaartigu, sulisussallu sulitillugit. Kommunilli tallimaasut aamma periusissiaqalernissaat takorusunnarpoq, kommuninimi suliniutit kivinneqartussaapput, Steven Arnfjord oqarpoq.
Taassuma erseqqissarpaa angerlarsimaffeqanngitsuuneq pillugu, taakkununngalu suliniutit pillugit oqaatsit atorneqartut assigiissaaqqullugit kommunit oqaloqatigiittarnissaat pisariaqartoq. Periusissiaqarnermi najukkami, nunalu tamakkerlugu suliniutit pineqartillugit assigiimmik paasinninnissaq aamma pingaartuusoraa.