Ilisimatusartoq: Kalaallit Nunaat illersornissaq pillugu isumaqatiginninniarnermi nutaamik annertussuseqartumik ilanngunneqassaaq

Danskit naalakkersuisuisa Kalaallit Nunaata illersornissaq pillugu isumaqatiginninniarnernut qanoq ilanngunnerussaneraa takussallugu pissanganarpoq, taanna maannamut danskit naalakkersuisuinut suliassaqarfiusimavoq, ilisimatusartoq taama naliliivoq. Illersornissaqarfimmilu aningaasaliinerit angisuut Issittumi pisinnaasut taassuma aamma oqaatigaa.

Assersuutigalugu umiarsuarnut alapernaarsuutinut nutaanut aningaasaliisoqassappat, taava illersornissamut isumaqatigiissutaasussat ilarujussuinik pisariaqartitsiffiussaaq, ilisimatusartoq oqaluttuarpoq.

Danskit naalakkersuisuisa illersornissaqarfimmut aatsaat taama amerlatigisunik ukiunut qulinut aningaasaliissuteqarnissamut sinaakkutitut isumaqatigiissummut siunnersuutertik saqqummiuteqqammerpaat, aningaasat qanoq atorneqarnissaannut Kalaallit Nunaat Savalimmiullu isumaqatiginninniarnerni qitiusumik inissisimassapput.

Kristian Søby Kristensen, Københavns Universitetimi Institut for Statskundskabimi ilisimatusartuuneq, taama naliliivoq.

Tunngaviusumik inatsit naapertorlugu, nunanut allanut tunngasunut sillimaniarnermullu politikkimi suliassaqarfiit danskit naalakkersuisuinut suliassaqarfiusut, ilisimatusartup oqaatigaa:

- Kalaallit Nunaat aamma Savalimmiut pingaartumik nunanut allanut tunngasunut politikkimi attuumassuteqaraangata periuseq atorneqartalerpoq.

Oqartussaviusinnaagunanngitsut

- Taamatut periuseqarneq illersornissamik suliassaqarfimmi atorneqaleriartorpoq, tassani danskit naalakkersuisui oqarput, Kalaallit Nunaat Savalimmiullu aningaasaliinernut aalajangersimasunut sinaakkutissatut isumaqatigiissummik suliaqarnermut ilanngunneqassallutik, Kristian Søby Kristensen oqarpoq.

Kalaallit Nunaat Savalimmiullu oqartussaviusinnaagunanngitsut taanna naliliivoq, kisianni danskit illersornerisa qanoq ineriartornissaannut tunngatillugu naalagaaffeqatigiinnermi immikkoortut marluk oqartussaassuseqassasut ilimagaa.

- Taanna qanimut malinnaaffigissavara, tassa Savalimmiut Kalaallit Nunaatalu isumaqatiginninniarnerni taakkunani qanoq ilanngunneqarnerat pissanersoq, Kristian Søby Kristensen oqarpoq.

Illersornissaqarfiup Issittumi aamma Atlantikup Avannaani sakkutooqarnikkut unammilligassaanut tunngatillugu, Kristian Søby Kristensenip oqarnera naapertorlugu, pingaarnertut alapernaarsuinermut aamma najuunnermut tunngassuteqarput.

Issittumi najuunneq akisuvoq

- Susoqarneranik ilisimasaqartoqarnerussaaq, qisuariarnissamullu periarfissaqarlunilu aningaasassaqartoqassalluni. Imaanngitsoq timmisartunik malersuuterpassuarnik peqartoqartariaqartoq, kisianni aaqqissuussaanerusumik aamma nunap immikkoortuani siamasissumik najuuttoqassaaq, taanna oqarpoq.

Issittumilu sakkutooqartitsineq akisuvoq, taamaattumillu politikerit isumaqatiginninniarnernik aallartitsippata, saniatigut aningaasat ukiuni qulini tulliuttuni atorneqalerpata, aningaasaliinerit annertuut ilaat Issittumi pissagunarput:

- Assersuutigalugu umiarsuarnut alapernaarsuutinut nutaanut aningaasaliisoqassappat, taava illersornissamut isumaqatigiissutaasussat ilarujussuinik pisariaqartitsiffiussaaq, Kristian Søby Kristensen oqarpoq.

Isumaqatiginninniarnerit agguataarneqassasut

Danmarkimi naalakkersuisut danskit illersornerannut sillimaniarnerannullu ukiuni qulini tulliuttuni katillugit 143 mia. koruunit missaanniittunik aningaasaliiniarput. Aningaasat qanoq atorneqarnissaannut isumaqatiginninniarnerit aasap naalernerani ukiamilu pinissaat naatsorsuutigineqarpoq.

Danskit naalakkersuisui siullermik Illersornissaqarfimmut ataatsimut periusissap aningaasatigullu sinaakkutissaq politikkikkut isumaqatigiissutiginiarpaat.

Powered by Labrador CMS