Ilisimatusartoq: Erngup aqqutaasa ilaasa salinneqarnerat sivisunaarsinnaavoq

Uummannami erngup aqqutaata ilangaatsiarsua eqqiluisaarnermut, eqqiaanermut errorsinermullu atorneqarsinnaasutut ammaanneqarpoq. Nukissiorfiit piffissami sivisujaami erngup aqqutaata ilarujussuanik kuutsitsinikkut saliisimavoq, tamannalu maanna iluaqutaalersimavoq.

Taamaakkaluartoq imermut avatangiisinullu tunngasuni immikkut ilisimasalik, VIA University Collegemi imermik imigassamik mingutsitsinermillu ajornartorsiutinik ilisimatusaatiginnittoq, naliliivoq, erngup aqqutaani annikinnerusuni uuliamik mingutsitsisoqarnerata kingorna imermik nillertumik kuutsitsinikkut saliineq sivisunaarsinnaasoq.

Ilisimatusartorli, Loren Ramsay, erseqqissaavoq, transformerolie akuleriissitanik tunisassiaasoq, sananeqaatinik ataasiakkaanik arlalissuarnik akoqartoq.

- Sananeqaatit amerlanersaat apolæriupput, tassa imaappoq, plastikkimut qalliutinulluunniit erngup imigassap aqqutaata iluaniittunut nippussuuteqqajaasarput, Loren Mark Ramsay Sermitsiaq.AG-mut oqarpoq.

- Taamaattumik imermik nillertumik kuutsitsinerup sivisunaarsinnaanera ilimagineqassaaq. Takorloorpara mingutsitsineq piffissap ingerlanerani annikilliartuaarumaartoq, kingusinnerusukkut annikitsualunnik malunniuttoqartarnissaanut aarlerinaateqarluni, oqaatigineqarpoq.

Kuutsitsilluni saliineq

Nukissiorfiit piffissap imaalinerani erngup aqqutaanik imermik kuutsitsilluni saliipput. Nukissiorfiit qullersaqarfiat Sermitsiaq.AG-mut paasissutissiivoq, imermik kuutsitsinermi imermik nillertoq imeqarfimmeersoq atorneqartoq.

Imermik kuutsitsinikkut erngup aqqutaani mingutsitsineq annikilliartuaassaaq. Ruujorillu aalajangersimasut erngup aqqutaanit minnerusunit allanit salissallugit ajornannginnerupput.

- Pingaartumik ruujorini erngup piffissap ilaani uninngaannarfigisartagaani mingutsitsineq annertuseqqissinnaasarpoq, ruujorinit imermik annertuumik aqqusaarneqartartuni sananeqaatit mingutsitsissutaasut apparsimaartinneqartarmata. Taamaalilluni erngup aqqutai angisuut ajornannginnerusumik salinneqarsinnaapput, erngullu aqqutai annikinnerusut salikkuminaannerusarlutik, Loren Ramsay oqarpoq.

Nukissiorfiit sapaatip-akunnerani siusinnerusukkut tusagassiuutitigut nalunaarut aqqutigalugu paasissutissiipput, illunut erngup aqqutai ullut tamaasa kuutsitsinikkut salinneqartartut, maannalu pitsanngoriaatit annertuut takuneqarsinnaalereersut, Uummannamilu erngup aqqutaata annerpaartaa uffarnermut, eqqiaanermut errorsinermullu kiisalu erruinermut atugassatut maanna aamma ammaanneqarsimalersoq.