Ilisimatusartoq inaarutaasumik nalunaarut pillugu: Taaneqanngitsut soqutiginarnerupput
Inaarutaasumik nalunaarut Attaveqatigiinnermut Ataatsimiititaliap ataatsimeereernerani nassiunneqartoq, ataatsimiinnerup imaqarniliaatut eqqaanarneruvoq. Tunngaviusuni isumaqatigiittoqarpoq, taamallu nalunaaruteqarneq soqutiginarluinnarpoq, ilisimatusartoq oqarpoq.
Attaveqatigiinnermut Ataatsimiititaliaq illersornissamut, nunanut allanut tunngasunut sillimaniarnermullu politikki pillugit marlunngornermi ataatsimiipput. Ataatsimeereernermili ministeriunerup, Naalakkersuisut siulittaasuata lagmandillu inaarutaasumik nalunaarut atsiugaat annertunerusumik imaqanngilaq.
- Imaqarniliaaneruvoq, ataatsimoorussamillu nalunaarutitut taasassaarpiarani. Ataatsimoorussamik nalunaarutigineqartut tunngaviusumik isumaqatigiiffiunerupput, Jeppe Strandsbjerg naliliivoq. Taanna Nasiffimmi lektoriuvoq - Nasiffik tassaavoq Ilisimatusarfiup aamma Københavnimi Forsvarsakademip nunanut allanut tunngasunut sillimaniarnermullu politikkimut qitiusumik ingerlatsivia.
- Illersornissamut isumaqatigiissut taaneqarsimasoq assersuutigisinnaavarput. Atuarneqarsinnaasutut danskit naalakkersuisuisa pingaarnersiuinerat pillugu ilisimatitsisoqarsimarpasippoq, Jeppe Strandsbjerg oqarpoq. Nalunaarummi taaneqarsimanngitsut tassaasinnaapput nunatta annertunerusumik sunniinera:
- Imaassinnaavoq Kalaallit Nunaata sunniuteqarnerani inaarutaasumik naliliineq "Tamatta isumaqatigiippugut"-mik nipaqanngitsoq, tamannami Danmarkip malunnartikkusunnerusimassagaluarpaa, oqarpoq.
Ambassadør pillugu isumaqatigiinnginneq ersarissoq
Nalunaarummi isumaqatigiissutigineqanngitsoq tassaavoq naalagaaffeqatigiit ataatsimiinnerani sammisat annerit ilaat. Tassa issittumi ambassadørimik toqqaasoqarnerani Kalaallit Nunaat sakkortuumik isornartorsiuinera, qallunaarmi ambassadørinngortinneqarmat.
Suliamut aaqqiissutissamik nassaartoqareerpoq:
- Aaqqiissuteqartoqarnissaa naatsorsuutigineqarsinnaagaluarpoq, kisianni taaneqarsimanngiivippoq. Naluara tupaallannartuunersoq, ilisimavarpummi nunatta pingaartilluinnaraa aalajangernerup maluginiaqqunissaa, Jeppe Strandsbjerg oqarpoq.
Ilisimatusartup immikkut maluginiarpaa Naalakkersuisut siulittaasuat, Muté B. Egede (IA), kingorna oqariartormat nunarput nammineerluni qaammatialuit ingerlaneranni aaqqiissutissamik nassaarumaartoq naatsorsuutigalugu.
Siulittaasuuffimmi immikkut inissaqartoq
Issittumi Siunnersuisoqatigiit pillugit nalunaarummi oqaaseqatigiit nunatta politikkikkut angusaattut nalilerneqarsinnaapput. Tassani erseqqissarneqarpoq nunatsinniit aallartitaq Savalimmiuniit qallunaaniillu siulliulluni oqaaseqartassasoq, aammalu siulittaasuuffimmi "immikkut ittumik inissisimassasoq". Siulittaasuuffik Kunngeqarfiup maajimi 2025-imi tigussavaa.
Jeppe Strandsbjerg isumaqarpoq oqaaseqatigiiliornermi nunarput naaperiarneqarsimasoq, immikkullu inissisimasussaatitaanermi ministerinik ataatsimeeqateqartarnermut tunngasuusinnaalluni.
Nunat tamalaat akornannut attaveqarneq
Ilisimatusartup ilanngullugu maluginiarpaa Savalimmiut Kalaallit Nunaallu nunap aqqi atorlugit nunat allat suliniaqatigiiffiinut ilaasortanngorsinnaanerat pillugu oqaloqatigiissimaneq.
- Soqutiginarluinnartutut isigaara nunat tamalaat akornannut attaveqarnissamik peqataanissamillu kissaateqarneq pineqarmat. Nunanut allanut tunngasunut naalakkersuisoqarfimmit qatsunnarsinnaasassaaq sulinermi danskit tunngaviusumik inatsisaat atorneqartussaasarmat, taamaattumillu Kalaallit Nunaat Savalimmiullu nunagisamik atii atorlugit nunat tamalaat akornanni oqaaseqarsinnaasaratik.
Nalunaarummi taaneqanngilaq suliniaqatigiiffiit naapittarfiillu nunat tamalaanut attaveqaataasut sorliit pineqarnersut. Danskilli nutaarsiassaqartitsiviat Jyllands-Posten naapertorlugu assersuutigineqarpoq Savalimmiut kissaatigigaat nunarsuarmi niueqatigiinneq pillugu suliniaqatigiiffimmi - WTO-mi - oqaaseqarsinnaasarnissartik.