Ilisimatusarnerup nutaap Tunumi atugarissaartoqartoq inuunerissaartoqartorlu ersersippaa
Pinngortitaq nerisassanillu avitseqatigiittarneq ilaatigut tassaapput inuit pitsaasumik inuuneqarneqarnerannut tunngaviusut ilaat. Ilisimatusartup Naja Carina Steenholdtip Tunumi inuit isumaat malillugit pitsaasumik inuuneqarnerat pillugu allaaserisaqarnermini tamanna paasisimavaa, allaaserisami aamma suliffeqarnerup attaveqaateqarnerullu imaluunniit suliffeqannginnerup attaveqaateqannginnerullu akornanni assigiinngissuseq ersersinneqarpoq.
Ph.d.-mik ilinniagaqartoq Naja Carina Steenholdt illoqarfinnut nunaqarfinnullu 13-inut tikeraarluni innuttaasunik nunamilu tamarmik inunnik 70-inik oqaloqateqarnermigut inuunerissaarnermik misissuisimavoq.
Taassuma ilisimatusaatigalugu allagaqaammini nutaami misissoqqissaarsimavaa, Tunumi innuttaasut akornanni pitsaasumik inuuneqarneq qanoq isumaqarfigineqarfigineqarnersoq, Allaaserisisaq tamarmi atuarneqarsinnaavoq UANI
Tunu pillugu allagaqaammi pingaarnertut inerniliunneqartoq tassaavoq, inuit suliffeqarnersut suliffeqannginnersulluunniit eqqarsaatigalugit pitsaasumik qanoq inuuneqarnissamut paasinnittaatsit assigiinngitsupilussuunerat.
- Suliffeqarneq pingaaruteqarpoq, aammali suliffeqanngitsuulluni inuuneq assigiinngissuseqarpoq. Suliffeqanngitsut inunnut allanut attaveqaatillit suliffeqaratik inunnut allanut attaveqaateqanngitsunut sanilliullutik pitsaasumik inuuneqarnissamut tunngavigissaarnerupput, Naja Carina Steenholdt Sermitsiaq.AG-mut nassuiaavoq.
Pisaasumik inuuneqarneq pillugu paasinnittaatsit assigiinngitsut
Apersuinerup ingerlanerani paasinarsisimavoq, apeqqutinut akissuteqarnissamut tunngaviit inunnut suliffilinnut suliffeqanngitsunullu assigiinngitsuusut.
- Suliffeqanngitsut akornanni pitsaasumik inuuneqarnissamik paasinnittaaseq allaaneroqaaq arlalitsigullu pisariaqartitsinermik imaqartarluni, inerniliinermi ilaatigut allassimavoq.
Inuit suliffillit pitsaasumik inuuneqarnissaminnut aaqqissuussaassuseq isumalluutillu pigeriikkatik taakkulu attatiinnarneqarnissaat tunngaviutittarpaat. Inuit suliffeqanngitsut aaqqussuussaassuseq isumallutillu piginngisatik sammineruaat, inuillu ilaannut taakku angujuminaassinnaallutik.
Inuit suliffeqarnikkut inissisimanerisa saniatigut paasinarsivoq, pinngortitaq aamma inuit inuunerissaarnerannut annertuumik sunniuteqartartoq.
- Inuit pinngortitaq piniariarnerinnarmuunngitsoq allatigullu pisariaqartitanuinnarnuunngitsoq atortarpaat, tassami peqqissinarnerutikkamikku aamma inuppassuarnut inuunerissaatitut pingaaruteqarluinnartuuvoq, Naja Carina Steenholdt oqarpoq.
Avitseqatigiittarnermik ileqqqoq attatiinnarneqartoq
Allaaserinninnermi paasisat pingajuat tassaavoq, pisanik peqqumaatinillu aviteqatigiittarnermik ileqquusup Tunumi sumiiffippassuarni suli atorluarneqarnera.
Apersorneqartut ilaasa tamanna imatut oqaasertalerpaa.
- Inuit (piniariarsimasup meerai) piniariareersimallutik uteraangamik neqinik, aalisakkanik pisarminnilluunniit allanik agguaassisarput. Tamanna uannut aamma pingaaruteqarpoq; qanga taamatut inuusimavugut. Inuuninni ileqqut tamakku pingaaruteqarluinnarput, perorsagaaninni tamanna ileqquuvoq.
Ilisimatusartup apersuinermini immikkut sammisimavai inunnut attaveqartarneq, misigissutsikkut atugarissaarneq kiisalu suliffeqarnikkut inissisimasneq taassumalu nalinginnaasumik atugarissaarnermut sunniutigisartagai.
- Suliffilinnut sanilliullugu suliffeqanngitsut pitsaasumik attaveqaateqannginnerat eqqarsaatigalugu inunnik attaveqaateqarnerup pingaaruteqassusaa arlalippassuarnik nassuiaatissaqarpoq. Inuit attaveqaateqanngitsut inuunerminni tunngavissaqarniartarneq imminullu pilersorniartarneq ajornartivittarpaat, taanna naggasiivoq.