suliffinnik pilersitsisoq
Ilisimatusarnermut ataatsimiinnermi AWG peqataatitaqartoq
Timersornerup tungaatigut aaqqissuussineq annertooq Arctic Winter Gamesitut ittoq inuussutissarsiornikkut ineriartortitsisinnaavoq
Arctic Winter Gamesip Nuummi pisortaa, Maliina Abelsen, Issittumi ilisimatusarneq pillugu ataatsimeersuarnermi, Aalborgip Universitetiani decembarip pingajuani sisamaanilu ingerlanneqartumi pingaarnertut oqagiartut ilagaat.
Suliniutip AWG-itut ittup inuussutissarsiornikkut ineriartortitsinermi sutigut tapertaanera Maliina Abelsenimit saqqummiunneqarpoq, annertuumik pilersaarusiornikkut ataqatigiissaarinermik misilittagaqalernikkut aammalu minnerunngitsumik sumiiffinni innuttaasunut amerlasuunut suliffeqarfinnullu ilinniutaaneratigut.
Aaqqissuussaq misissorneqassaaq
- AWG2016 Kalaallit Nunaata avammut nittarsaannissaanut, aammalu innuttaasut nakussassarneqarnissaannut periarfissaavoq immikkuullarissoq, taamaattumillu aamma suliniutinut pilersitsinissanullu annertuunut ilinniarfissaallunilu assersuutissaqqippoq, Maliina Abelsen oqarpoq.
- Ataatsimeersuarnerup matuma saniatigut AWG2016-ip nalilersorneqarnissaanut Aalborg Universitetimik suleqateqarpugut. Suliniutit matumatut ittut sorpianik pilersitsiffiunerat takussallugu pingaaruteqartorujussuuvoq, taamaattumillu nuannaarutigisorujussuuarput Aalborg Universiteti tamatuminnga misissuerusummat. Suliami piginnaasanik ineriartortitsineq, nittarsaassineq, tapersersuineq aamma peqataaneq aallaavigalugit Aalborg Universitetimit aamma University of Queenslandimit misissorneqassapput, Maliina Abelsen naggasiivoq.
Peqataasut amerlasuut
AWG2016 pillugu saqqummiinerup kingorna AWG2016 pillugu immikkut sammisaqartitsisoqarpoq.
Ataatsimeersuarneq 100-t missaanniittunit Kalaallit Nunaanneersunit Danmarkimeersunillu peqataaffigineqarpoq.