Ilisimatusarnermik Siunnersuisoqatigiit innuttaasunut qanilaarnerusumik ilisimatusartunut tapiissuteqarpoq
Amermik atisaliat, aliasunnermi ikiorserneqarneq aamma innuttaasut nunanut allanut aamma sillimaniarnermut politikkimut isumaannik misissuinerit ilisimatusarnikkut suliniutit tallimat 100.000 koruuninik Nunatsinni Ilisimatusarnermik Siunnersuisoqatigiinnit pissarsisut ilagaat.
Nunatsinni Ilisimatusarnermik Siunnersuisoqatigiit ilisimatusarnikkut suliniutit tallimat katillugit millionit affaannik aningaasartalimmik agguaaffigaat. Siunnersuisoqatigiit aningaasanik allarnisaanernut nutaanut innuttaasunut ilisarnartunut, atorneqarsinnaanissaannullu sammisunut ineriartortitsinissamut pituttorsimanngitsumillu ilisimatusarnissamut siuarsaataassasut neriuuteqarput.
- Isumassarsiat pitsaasut ilisimatusarnermillu nutaaliornermillu tunngavilinnik ilisimatusarnerup ineriartortitsinissaasanut pitsaasunik sinaakkuteqarnissaq pingaaruteqarpoq. Takusinnaavarput ilisimatusartartut, suliffeqarfiit aammalu innuttaasut inuiaqatigiit akornanni pisariaqartunik paasisaqarnermikkut soqutiginartunik suleqatigiissutaasunik aaqqiiniarlutik suliniutinik arlalinnik ingerlatsisoqartoq. Tamannalu apeqqusiinata tapersersorsinnaavarput, Nunatsinni Ilisimatusarnermik Siunnersuisoqatigiit siulittaasuat Josephine Nymand oqarpoq.
Suliniutit ilaanni internet atorlugu aliasuummik katsorsaasarnerup ineriartortinneqarnissaat suliarineqassaaq.
Ilinniartunut siunnersuisarfik Namminersorlutik Oqartussat ataani Nuna tamakkerlugu siunnersuisarfik, internet aqqutigalugu Nunatsinni ilinniartunut internet aqqutigalugu aliasunnermik katsorsaasarnermik misiliutaasumik ineriartortitsiniarpoq.
Inuusuttut misigisaannik aallaaveqartoq
Misiliutaasumik misissuineq misilittakkat ilinniartullu onlinekkut aliasuummut katsorsartillutik peqataasut innersuussutaat aallaavigalugit aliasuttut akuliuffigalugit oqaloqateqariaaseq nutaaq atuisuusut ilinniartut peqatigalugit ineriartortissavaat.
Ilisimatusartoqatigiit nalunaarusiaq 'Qamani', ukioq manna septembarimi MIO-mit saqqummersinneqartoq innersuussutigaat, tassani inuusuttorpassuit aliasunnerminnik aammalu ass. ilaquttat imaluunniit ikinngutit imminnut toqussimanerannut tunngatillugu imminut pisuutinneq kanngusunnerlu pillugu oqaloqateqarnissaminnik annertuumik pisariaqartinneqartut ersermat.
Suliniut pineqartoq Ilinniartunut Siunnersuisarfimmit aallartisarneqartoq, maannamullu Namminersorlutik Oqartussat imminut toquttarnermut pinaveersaartitsineranut ilaanngitsoq, Ilisimatusarnermik Siunnersuisoqatigiit erseqqissarpaat.
Suliniutinut aningaasaliiffigineqartunut takussutissat:
- Anja Hvidtfeldt Stanek Aliasunneq – ilinniartut inuusuttut aliasuuteqartut onlinekkut katsorsarneqartut isumaat, Nuna tamakkerlugu Siunnersuisarfik, Namminersorlutik Oqartussat aamma Syddansk Universitet.
- Maria Ackrén Foreign- and security policy opinion poll in Greenland Nasiffik – Nunanut allanut sillimaniarnermullu ilisimatusarfik, Ilisimatusarfik
- Anne Lisbeth Schmidt Skinddragter Online – Fornyelse og fremtidssikring af kulturhistorisk genstandsbases website Danmarks Nationalmuseum aamma NKA – Nunatta Katersugaasivia Allagaateqarfialu
- Pernille Jensen Writing a proposal to develop WASH solutions for Arctic communities Arctic DTU - Ilinniarfeqarfik Sisimiut
- Thomas Ingeman-Nielsen Feasibility study towards the GSIS - Greenland Snow and Ice Service Arctic DTU - Ilinniarfeqarfik Sisimiut.