Ilisimatusarnermi Siunnersuisoqatigiit nutaanik ilaasortartaartut
Nunatsinni Ilisimatusarnermi Siunnersuisoqatigiit nutaanik pingasunik ilaasortalernermikkut nukissanik nutaanik tunineqarput.
Naalakkersuisut Nunatsinni Ilisimatusarnermi Siunnersuisoqatigiinni ilaasortassanik nutaanik toqqaasimapput. Siunnersuisoqatigiit ilaatigut suliassaraat Kalaallit Nunaanni ilisimatusaatissanik toqqaallutillu ilisimatusarnernut aningaasaliissuteqartarnissaq:
- Siunnersuisoqatigiinni laasortat nutaat ilaasortaareersut allat peqatigalugit ilisimatusarnermik ilinniagaqartunut 7,5 millioner koruunit ukiumoortumik agguaattassavaat, kiisalu 1,2 millioner koruunit ukiumoortumik ilisimatusartunut agguaattassallugit, siunnersuisoqatigiit tusagassiorfinnut nalunaaruteqarnermi allapput.
Siunenrsuisoqatigiinni siulittaasoq naapertorlugu, ilisimatusartarnerup Kalaallit Nunaanni atuuttuartinneqarnissaa piffissami aggersumi suli ukkatarineqarniarpoq:
- Ilisimatusarnermik Siunnersuisoqatigiit ilisimatusartarnerup inuiaqatigiinni atuuttuartinneqarnissaa sulissutigaat. Kalaallit Nunaanni ilisimatusartarnerup ilisimasaqassuseq piginnaasaqassuserlu qaffassaataaffigisarpai.
- Pingaartumik ilisimatuut nunanit allaneersut nunatsinni ilisimatusartartut taakkulu Kalaallit Nunaanni ilisimatusartunut attuumassuteqartarnerat ukkatarineqassaaq. Tassunga atatillugu suleqatigiittarnitta pitsaassusaa nukittorsarneqarlunilu ilisimatusarnerit inuiaqatigiiinnut sunniuteqarluartartut saqqummiunneqartartullu ingerlatiinnarneqarnissaat qulakkeerneqassaaq, Josephine Nymand oqarpoq.
Ilaasortanngortut nutaat:
Aviaja Lyberth Hauptmann, Postdoc, Kalaallit Nunaanni Peqqissusernik Ilisimatusarfik
Christian Wennecke, Pisortaq, Greenland Business A/S
Eva Mätzler, Immikkoortortami pisortaq, Asiaq Greenland Survey
Ilaasortanngortut nutaat saniatigut siunnersuisoqatigiinni ilaasortaareersut uku ukiuni pingasuni ilaasortaaqqittusatut toqqarneqarput:
Siulittaasoq Josephine Nymand, Immikkoortortami pisortaq, Pinngortitaleriffik, Avatangiisinut Aatsitassanullu immikkoortortaqarfik
Thomas Ingemann, Lektori, Danmarks Tekniske Universitetimi Sanaartornermut Insituti
Morten Meldgaard, ph.d., dr.phil., professor ved Ilisimatusarfik og GLOBE Instituttet, Københavns Universitet
Gert Mulvad, Nakorsaq, Dronning Ingridip Peqqissaavia, Kalaallit Nunaanni Peqqissusermik Ilisimatusarfik
Christian Koch Madsen, Nunatta Katersugaasivia Atuagaateqarfialu